तुळजापूर| 'Only न्यूज धाराशिव' वृत्तसेवा
लाखो भाविकांच्या उपस्थितीत श्री क्षेत्र तुळजापुरात अत्यंत उत्साहात पार पडलेला शारदीय नवरात्र महोत्सव कोणताही अनुचित प्रकार न घडता, शांततेत व निर्विघ्नपणे पार पाडण्यात महत्त्वपूर्ण भूमिका बजावणाऱ्या विविध प्रशासकीय विभागांच्या प्रमुखांचा काँग्रेस पक्षाच्या नगरसेवकांकडून विशेष सन्मान करण्यात आला.
तुळजापूर नगरपालिकेचे काँग्रेस गटनेते अमोल कुतवळ, नगरसेवक रणजीत इंगळे, आनंद जगताप, अक्षय परमेश्वर, किरण कदम व पदाधिकाऱ्यांच्या वतीने उपविभागीय पोलीस अधिकारी (DYSP) मनोहर पाटील, नगरपालिकेचे मुख्याधिकारी अजिंक्य रणदिवे आणि एसटी महामंडळाचे आगारप्रमुख महेश रामपुरे यांचा शाल, श्रीफळ व पुष्पगुच्छ देऊन गौरव करण्यात आला.
नियोजनाचे मोठे आव्हान यशस्वीपणे पेलले
शारदीय नवरात्रोत्सवाच्या कालावधीत संपूर्ण देशभरातून येणाऱ्या भाविकांची अलोट गर्दी, कायदा व सुव्यवस्थेचा प्रश्न, शहरातील वाहतूक नियंत्रण, तसेच स्वच्छता व सार्वजनिक सुविधा पुरवणे हे प्रशासनासमोर मोठे आव्हान होते. मात्र, पोलीस प्रशासन, नगरपालिका आणि एसटी महामंडळ यांनी आपापसात उत्तम समन्वय राखत अहोरात्र परिश्रम घेतले. त्यामुळेच हा उत्सव अत्यंत सुरक्षित आणि शिस्तबद्ध वातावरणात पार पडला.
भाविकांच्या सेवेसाठी घेतलेल्या कष्टांचे कौतुक
यावेळी बोलताना गटनेते अमोल कुतवळ व नगरसेवकांनी सांगितले की, "लाखो भाविकांच्या सुरक्षेची आणि सुविधांची जबाबदारी तत्परतेने पार पाडणाऱ्या अधिकाऱ्यांचे कौतुक करणे हे आमचे कर्तव्य आहे. प्रशासनाच्या या नियोजनबद्ध कामगिरीमुळेच देशभरातून आलेल्या भाविकांना सुलभ दर्शन घेणे शक्य झाले."
या सन्मानाबद्दल तिन्ही अधिकाऱ्यांनी आभार व्यक्त करत, जनतेचे सहकार्य आणि कर्मचाऱ्यांचे अहोरात्र परिश्रम यामुळेच हा उत्सव यशस्वी झाल्याची भावना व्यक्त केली. या सत्कार प्रसंगी काँग्रेस पक्षाचे अनेक पदाधिकारी, कार्यकर्ते आणि स्थानिक नागरिक मोठ्या संख्येने उपस्थित होते.
0 Comments