काटी/उमाजी गायकवाड
तुळजापूर तालुक्यातील काटीतील अल्पभूधारक शेतकरी अनिल बनसोडे यांच्या घरी यंदा बैलगाडी घरात नेऊन चक्क बैलगाडीत गौरी लक्ष्मी स्थापना केली. अनिल बनसोडे दरवर्षी गौरी लक्ष्मी सणात नाविण्यपुर्ण उपक्रम राबवून गौरी लक्ष्मी समोर आकर्षक सजावट करतात.
यंदा घरोघरी मोठ्या आनंदाने गौरी आगमनाचे स्वागत करण्यात आले. बुधवार दि.(27) रोजी गणपतीच्या जल्लोषपुर्ण आगमना नंतर रविवारी घरोघरी गौरींचे आगमन झाले. बाप्पांच्या आगमनानंतर उत्सवातील महत्वाचा सण म्हणजे ज्येष्ठा गौरीचे आगमन व पुजन. भाद्रपदातील ज्येष्ठा-कनिष्ठा गौर ही माहेरवाशीण म्हणुन ओळखली जाते.शिवप्रिया पार्वती ही गौरीच्या रुपाने येते व तिच्या आगमनावेळी धन-धान्याची आरास असल्याने गौराई सोन्याच्या, मोत्याच्या पावलांनी घरात प्रवेश करते असं मानलं जातं त्यामुळे परिसरात मोठय़ा भक्तीभावाने गौरीचे स्वागत करण्यात आले.
गौरींचे मुखवटे,दागिने,साड्या,मखर व सजावटीचे साहित्य खरेदीसाठी व लक्ष्मीचे स्वागत करण्यासाठी, प्रतिष्ठापणेची सजावट व पुजन करण्यासाठी घरोघरी लगबग सुरु होती.
कौटुंबिक परंपरेनुसार काहींनी गौरीच्या मुखवट्यांना झळाळी दिली.यंदा प्रथमच घरी गौरीचे आगमन झालेल्या कुटुंबियांनी नवीन मुखवटे खरेदी केले.काटी येथील प्रसिद्ध श्रीकांत कुंभार यांच्या श्री आर्टमधून मुखवटे,खेळणी व सजावटीचे साहित्य खरेदी करण्यात आली.
गावातील काही व्यापारी, शेतकरी यांनी झेंडू,गुलाब, शेवंती आणि जरबेरा या सारखी फुले विक्रीसाठी आणली होती. दरम्यान, घरोघरी विधीवत महालक्ष्मी (गौरी) प्रतिष्ठापना करण्यात आली. सोमवारी गौरीचे महाप्रसाद (नैवेद्य) झाला तर मंगळवारी गौरी विसर्जन झाले.
महालक्ष्मी प्रतिष्ठापना व सजावट यांचे वेगळे समीकरण आहे. सोने-चांदीची नवीन मंगळसूत्रे, कमरपट्टा, बाजूबंद व इतर दागिन्यानी गौरी लक्ष्मीस सजवण्यात आले होते. तर लक्ष्मी समोर पायर्या तयार करून विविध प्रकारचे फराळाचे साहित्य, विविध प्रकारची खेळणी,आकर्षक विद्युत रोषणाई करण्यात आली होती. काटी येथील अल्पभूधारक शेतकरी अनिल बनसोडे यांच्या कुटुंबातील सदस्यांनी यंदा रात्री उशिरा पर्यंत जागून बैलगाडीत गौरी लक्ष्मीची स्थापना करुन गौरी लक्ष्मी समोर अतिशय आकर्षक मांडणी आरास सर्वांचे लक्ष वेधून घेतले होते. लहान बालके गौरी लक्ष्मी व त्यापुढे मांढलेली खेळणी पहाण्याचा आनंद घेत होते.
0 Comments