'🚩सुरतगावात शिवजन्मोत्सवाचा जल्लोष; लेझीमच्या तालावर निघाली भव्य मिरवणूक'. 🩸रक्तदान शिबिरातून 60 दात्यांनी जपली सामाजिक बांधिलकी; व्याख्यानाने शिवरायांचा इतिहास उलगडला

काटी/उमाजी गायकवाड

तुळजापूर तालुक्यातील सुरतगाव येथे 'छत्रपती शिवाजी महाराज क्रीडा व सांस्कृतिक मंडळा'च्या वतीने शिवजयंती उत्सव अत्यंत उत्साहात आणि विविध सामाजिक उपक्रमांनी साजरा करण्यात आला. यावेळी आयोजित रक्तदान शिबिर आणि लेझीम पथकाचे सादरीकरण गावकऱ्यांच्या विशेष आकर्षणाचा केंद्रबिंदू ठरले.

सामाजिक उपक्रमांची जोड

उत्सवाचे औचित्य साधून 19 फेब्रुवारी रोजी शिवरायांच्या मूर्तीची प्रतिष्ठापना करण्यात आली. उत्सवाच्या काळात दररोज मंडळाच्या सदस्यांच्या हस्ते महाराजांची आरती करण्यात आली. '🩸रक्तदान हेच श्रेष्ठ दान' हा संदेश देत आयोजित करण्यात आलेल्या रक्तदान शिबिराला तरुणांचा मोठा प्रतिसाद मिळाला, ज्यामध्ये 60 रक्तदात्यांनी उत्स्फूर्तपणे रक्तदान केले. तसेच, सुप्रसिद्ध शिवव्याख्याते वसंत हंकारे सर यांनी आपल्या ओघवत्या शैलीत शिवचरित्रावर व्याख्यान देऊन उपस्थितांना मंत्रमुग्ध केले.

⛳लेझीम पथकाने जिंकली मने

दिनांक 27 फेब्रुवारी रोजी गावातून छत्रपती शिवाजी महाराजांची भव्य मिरवणूक काढण्यात आली. मिरवणुकीची सुरुवात गावातील ज्येष्ठ नागरिकांच्या हस्ते करण्यात आली, तर सांगता महिलांच्या हस्ते आरती करून करण्यात आली. या मिरवणुकीत मंडळाच्या लेझीम पथकाने आपल्या कलागुणांचे प्रदर्शन केले, ज्याने संपूर्ण गावाचे लक्ष वेधून घेतले.

⭕नियोजनबद्ध सोहळा⭕

हा शिवजन्मोत्सव सोहळा यशस्वी करण्यासाठी मंडळाचे अध्यक्ष विजय संजय नकाते, उपाध्यक्ष श्रीकांत विक्रांत गुंड, सचिव शंभू नागनाथ येळणे यांच्यासह मंडळाच्या सर्व सदस्यांनी अहोरात्र परिश्रम घेतले. यावेळी गावातील प्रतिष्ठित नागरिक, महिला, युवक आणि ग्रामस्थ मोठ्या संख्येने उपस्थित होते.