आदर्श विद्यालयात गुणवंतांचा गौरव आणि दहावीच्या विद्यार्थ्यांना भावपूर्ण निरोप! चिकाटी आणि शिस्त हीच यशाची गुरुकिल्ली: रामकृष्णपंत खरोसेकर यांचे प्रतिपादन

मुरुम/प्रतिनिधी

उमरगा येथील आदर्श विद्यालयात इयत्ता 10 वी (SSC) विद्यार्थ्यांचा निरोप समारंभ आणि वार्षिक पारितोषिक वितरण सोहळा मोठ्या उत्साहात संपन्न झाला. या कार्यक्रमाच्या अध्यक्षस्थानी प्राचार्य सैपन शेख होते, तर प्रमुख अतिथी म्हणून श्रमजीवी शिक्षण संस्थेचे सचिव मा. रामकृष्णपंत खरोसेकर उपस्थित होते. यावेळी पर्यवेक्षक श्रीपाद कुलकर्णी व प्राथमिक विभागाचे मुख्याध्यापक सुदेश माने यांचीही प्रमुख उपस्थिती होती.

गुणवंतांचा गौरव:

कार्यक्रमाची सुरुवात सरस्वती पूजनाने झाली. वर्षभर राबवण्यात आलेल्या बौद्धिक, क्रीडा आणि सांस्कृतिक स्पर्धांमधील यशस्वी विद्यार्थ्यांना मान्यवरांच्या हस्ते गौरवण्यात आले. यामध्ये विनायक ज्ञानेश्वर भोसले आणि कु. मिमरा महमंद रफिक काझी यांची सन 2026 चे 'आदर्श विद्यार्थी' म्हणून निवड करण्यात आली. स्मृतीचिन्ह देऊन त्यांचा विशेष सन्मान करण्यात आला.

उत्कृष्ट खेळाडू व कलाकार:

खेळात नैपुण्य दाखवल्याबद्दल 5 वी ते 7 वी गटातून कु. खुशी राठोड व शहाजी माने, तर 8 वी ते 10 वी गटातून कु. कृष्णवेणी आबाचणे व सुभान पठाण यांना 'उत्कृष्ट खेळाडू' पुरस्काराने सन्मानित करण्यात आले. तसेच प्रजासत्ताक दिनातील सांस्कृतिक कार्यक्रम, गणित प्रदर्शन आणि इतर स्पर्धांमधील विजेत्यांनाही प्रमाणपत्रे देण्यात आली.

मान्यवरांचे मार्गदर्शन:

प्रमुख अतिथी मा. खरोसेकर साहेब आपल्या भाषणात म्हणाले की, "यश हे केवळ नशिबावर अवलंबून नसून ते सकारात्मक दृष्टिकोन, शिस्त आणि वेळेच्या नियोजनावर अवलंबून असते. अपयशाला न घाबरता चुकांमधून शिका, कारण प्रत्येक नवीन दिवस प्रगतीची संधी घेऊन येतो." त्यांनी प्राचार्य शेख यांच्या नाविन्यपूर्ण उपक्रमांचेही कौतुक केले.

अध्यक्षीय भाषणात प्राचार्य सैपन शेख यांनी विद्यार्थ्यांच्या सर्वांगीण विकासावर भर दिला. ते म्हणाले, "केवळ पुस्तकी ज्ञान पुरेसे नाही, तर विद्यार्थ्यांचा शारीरिक आणि मानसिक विकास होणे हेच शाळेचे ध्येय आहे. आत्मचिंतन आणि सातत्य बाळगल्यास यश निश्चित मिळते."

मनोगत आणि आभार:

यावेळी 10 वीतील विद्यार्थी विनायक भोसले व सृष्टी शिंदे यांनी शाळेबद्दल कृतज्ञता व्यक्त केली. शिक्षकांमधून प्रशांत सोमवंशी यांनी विद्यार्थ्यांना परीक्षेसाठी शुभेच्छा दिल्या. कार्यक्रमाचे प्रास्ताविक पर्यवेक्षक श्रीपाद कुलकर्णी यांनी केले, सूत्रसंचालन श्रीमती पौर्णिमा दाहोत्रे यांनी केले, तर पारितोषिक वाचन तात्याराव फडताळे व दयानंद उमाटे यांनी केले. आभार प्रदर्शन रंगनाथ चाटे यांनी मानले.

हा सोहळा यशस्वी करण्यासाठी सुरेश शेंडगे, शिवराज सुरवसे, श्रीमती नीलिमा कुलकर्णी, श्रीमती बेबीसरोजा स्वामी, श्रीमती स्वरूपा चौधरी आणि विकास कांबळे यांनी परिश्रम घेतले.