🏛️ बावन बुरजी बचाव कृती समितीच्या सिंदखेडराजा तालुकाध्यक्षपदी डॉ. शिवाजीराव खरात यांची निवड

धाराशिव |Only न्युज धाराशिव 

ऐतिहासिक वारसा जतनासाठी कार्यरत असलेल्या बावन बुरजी बचाव कृती समितीच्या सिंदखेडराजा तालुकाध्यक्षपदी डॉ. शिवाजीराव खरात यांची निवड करण्यात आली आहे. त्यांच्या निवडीमुळे समितीच्या कार्याला नवे बळ मिळेल, अशी भावना कार्यकर्त्यांमध्ये व्यक्त होत आहे.

करवंडचा इतिहास मराठा साम्राज्याच्या गौरवशाली परंपरेशी निगडित आहे. दि. १५ एप्रिल २०२६ रोजी राष्ट्रीय स्तरावरील ‘करवंड महोत्सव’ आयोजित करण्यात येणार आहे. याच दिवशी करवंड येथील सेनापती शिवाजीराव इंगळे यांच्या कन्या गुणवंताबाई यांचा विवाह छत्रपती शिवाजी महाराज यांच्याशी रायगड किल्ला येथे संपन्न झाल्याची ऐतिहासिक नोंद आहे. त्यामुळे हा महोत्सव शिवाजी महाराज व गुणवंताबाई इंगळे यांच्या विवाहदिनाच्या स्मरणार्थ विशेष महत्त्वाचा ठरणार आहे.

सिंदखेडराजा तालुका हा राजमाता जिजाऊ यांच्या जन्मस्थळामुळे ऐतिहासिकदृष्ट्या महत्त्वाचा मानला जातो. या पार्श्वभूमीवर डॉ. खरात यांच्यावर संघटनात्मक जबाबदारी सोपविण्यात आली आहे. त्यांच्या व्यापक जनसंपर्क, नेतृत्वगुण आणि सामाजिक कार्यातील सातत्यामुळे ते ही जबाबदारी समर्थपणे पार पाडतील, असा विश्वास समितीच्या पदाधिकाऱ्यांनी व्यक्त केला आहे.

डॉ. शिवाजीराव खरात हे विविध सामाजिक, शैक्षणिक व आर्थिक संस्थांमध्ये सक्रिय आहेत. त्यांनी यापूर्वी सिंदखेडराजा तालुका भाजपाध्यक्षपदाची धुरा सांभाळली असून सध्या ते भाजपाच्या राज्य परिषदेत कार्यरत आहेत. हिवरा गडलिंग ग्रामपंचायतीमध्ये गेल्या २५ वर्षांपासून त्यांचे नेतृत्व राहिले असून ते सलग १५ वर्षे सरपंच म्हणूनही कार्यरत होते. विविध सामाजिक उपक्रमांच्या माध्यमातून त्यांनी तालुक्यात सामाजिक एकोपा वृद्धिंगत केला आहे.

करवंड महोत्सवानिमित्त १५ एप्रिल रोजी ‘गुणवंता महाराणी ज्योत’ सिंदखेडराजा ते करवंड अशी भव्य ज्योत यात्रा आयोजित करण्याचा मानस त्यांनी व्यक्त केला आहे. या उपक्रमाद्वारे इतिहासाबाबत जागर निर्माण करणे आणि करवंडच्या वारशाचे संवर्धन करणे हे उद्दिष्ट आहे.

त्यांच्या निवडीबद्दल सुनील जवंजाळ पाटील, हरी रुद्रराजे इंगळे, विद्याधर महाले, गणेशराव राजेश जाधव, अरविंदराव देशमुख, अण्णासाहेब मळसणे, अॅड. ए. टी. नाना देशमुख, दिलीपराव नाईकवाड यांसह अनेक मान्यवरांनी अभिनंदन करून पुढील वाटचालीस शुभेच्छा दिल्या आहेत.

                                 — Only न्यूज धाराशिव

✍️'Only न्यूज धाराशिव' - थेट, स्पष्ट आणि तुमच्या हक्काची बातमी!