🏛️ बावन बुरजी बचाव कृती समितीच्या बुलढाणा शहराध्यक्षपदी अमोल इंगळे देशमुख; करवंड महोत्सवासाठी सज्जता

धाराशिव |Only न्युज धाराशिव 

ऐतिहासिक वारसा जतनासाठी कार्यरत असलेल्या बावन बुरजी बचाव कृती समितीच्या बुलढाणा शहराध्यक्षपदी तरुण, अभ्यासू व कार्यकर्तृत्ववान व्यक्तिमत्त्व म्हणून ओळखले जाणारे अमोल संजयराव इंगळे देशमुख यांची एकमताने निवड करण्यात आली आहे. त्यांच्या निवडीमुळे समितीच्या कार्याला नवचैतन्य मिळेल, अशी प्रतिक्रिया विविध स्तरांतून उमटत आहे.

करवंडचा इतिहास मराठा साम्राज्याच्या गौरवशाली परंपरेशी निगडित आहे. दि. १५ एप्रिल २०२६ रोजी समितीच्या वतीने राष्ट्रीय स्तरावरील भव्य ‘करवंड महोत्सव’ आयोजित करण्यात येणार आहे. १५ एप्रिल १६५७ रोजी करवंड येथील सेनापती शिवाजीराव इंगळे यांच्या कन्या गुणवंताबाई यांचा विवाह छत्रपती शिवाजी महाराज यांच्याशी रायगड किल्ला येथे पार पडल्याची ऐतिहासिक नोंद आहे. या स्मरणार्थ महोत्सवाला विशेष ऐतिहासिक महत्त्व प्राप्त झाले आहे.

बुलढाणा हे जिल्ह्याचे मुख्यालय असल्याने येथील संघटनात्मक बळकटीला विशेष महत्त्व आहे. या पार्श्वभूमीवर अमोल देशमुख यांच्यावर मोठी जबाबदारी सोपविण्यात आली आहे. त्यांचा व्यापक जनसंपर्क, सामाजिक कार्यातील सातत्य व नेतृत्वगुण लक्षात घेता ते ही जबाबदारी सक्षमपणे पार पाडतील, असा विश्वास कार्यकर्त्यांनी व्यक्त केला आहे.

अमोल इंगळे देशमुख विविध सामाजिक, शैक्षणिक व आर्थिक संस्थांमध्ये सक्रिय आहेत. ते ‘परिवार अर्बन को-ऑपरेटिव्ह क्रेडिट सोसायटी’चे उपाध्यक्ष तसेच ‘आभाळमाया बहुउद्देशीय सेवाभावी संस्था’चे अध्यक्ष म्हणून कार्यरत आहेत. ग्रामीण विकास, युवक संघटन आणि सामाजिक एकोपा वृद्धिंगत करण्यासाठी त्यांनी अनेक उपक्रम राबविले आहेत.

करवंड महोत्सवानिमित्त १५ एप्रिल रोजी बुलढाणा ते करवंड दरम्यान भव्य मोटरसायकल रॅली आयोजित करण्याचा त्यांचा मानस असून, युवकांमध्ये इतिहासाबाबत जागर निर्माण करणे व करवंडच्या “बावन बुरजी” या ऐतिहासिक वारशाचे संवर्धन करणे हे या रॅलीचे प्रमुख उद्दिष्ट आहे.

त्यांच्या निवडीबद्दल हरी रुद्रराजे इंगळे, विद्याधरजी महाले, अरविंदराव देशमुख, अण्णासाहेब मळसणे, अॅड. ए. टी. नाना देशमुख आदी मान्यवरांनी अभिनंदन करून पुढील वाटचालीस शुभेच्छा दिल्या आहेत.

समितीच्या कार्यकर्त्यांच्या मते, अमोल देशमुख यांच्या नेतृत्वाखाली करवंड महोत्सव अधिक भव्य, सुयोजित आणि ऐतिहासिकदृष्ट्या प्रभावी ठरेल व “बावन बुरजी” वारशाला राष्ट्रीय पातळीवर नवी ओळख मिळेल.

                           — Only न्यूज धाराशिव

✍️'Only न्यूज धाराशिव' - थेट, स्पष्ट आणि तुमच्या हक्काची बातमी!