चव्हाणवाडीच्या 'बालव्यापाऱ्यांचा' डंका! आनंदबाजारात हजारो रुपयांची उलाढाल;डिजिटल पेमेंटचाही वापर; विद्यार्थ्यांच्या व्यवहारज्ञानाचे ग्रामस्थांकडून कौतुक

"Only न्युज धाराशिव" वृत्तसेवा

काटी/उमाजी गायकवाड

"आनंदून गेला, आनंद सारा... बालआनंद बाजाराचा उत्साह न्यारा!" या उक्तीचा प्रत्यय नुकताच मौजे चव्हाणवाडी येथे आला. जिल्हा परिषद प्राथमिक शाळा चव्हाणवाडी येथील विद्यार्थ्यांनी आयोजित केलेल्या 'बालआनंद मेळा व आनंदबाजारात' लहानांपासून वृद्धांपर्यंत सर्वांचाच उत्साह ओसंडून वाहत होता. केवळ चार तासांत या चिमुकल्या विक्रेत्यांनी तब्बल १५ हजार रुपयांची उलाढाल करून सर्वांनाच थक्क केले.

विविधतेने नटलेला बाजार

स्थानिक श्री विठ्ठल-रुक्मिणी मंदिरासमोरील मुख्य चौकात सकाळी ८:३० ते १२:३० या वेळेत हा बाजार भरवण्यात आला होता. शाळा व्यवस्थापन समितीचे अध्यक्ष श्री. रामकृष्ण चव्हाण यांच्या हस्ते आणि सरपंच पांडुरंग चव्हाण व ग्रामस्थांच्या उपस्थितीत फीत कापून बाजाराचे उद्घाटन झाले. विद्यार्थ्यांनी मेथी, पालक, कोथिंबीर यांसारख्या पालेभाज्यांसह टोमॅटो, बटाटे, मटार अशा फळभाज्यांची दुकाने मांडली होती.

खाद्यपदार्थांची मेजवानी आणि उन्हाळी थंडावा

बाजारात केवळ भाज्याच नव्हे, तर इडली-सांबर, डोसा, कच्छी दाबेली, मिसळपाव आणि वडापाव अशा चटपटीत पदार्थांची रेलचेल होती. उन्हाळ्याची तीव्रता लक्षात घेता थंडगार मठ्ठा, लस्सी, कुल्फी आणि उसाच्या रसाच्या स्टॉल्सवर ग्राहकांची मोठी गर्दी दिसून आली. मिठाई आणि चहा-कॉफीच्या दुकानांनी बाजारात अधिकच रंगत आणली.

डिजिटल व्यवहाराने वेधले लक्ष

या बाजाराचे मुख्य आकर्षण म्हणजे 'पावभाजी' आणि 'फुटाणे विक्री' केंद्रावर उपलब्ध असलेली PhonePe आणि Paytm (QR Code) द्वारे पेमेंटची सुविधा! तंत्रज्ञानाच्या युगात विद्यार्थ्यांनी केवळ रोख व्यवहारच नव्हे, तर डिजिटल आणि कॅशलेस व्यवहारही आत्मसात केल्याचे पाहून पालकांनी आश्चर्य व्यक्त केले.

व्यावहारिक शिक्षणाचे धडे

"विद्यार्थ्यांना व्यवहारातील जमा-खर्च, नफा-तोटा आणि प्रत्यक्ष बाजारप्रक्रिया समजावी, या उद्देशाने या उपक्रमाचे आयोजन करण्यात आले," असे शाळेचे मुख्याध्यापक श्री. नितीन गायकवाड यांनी सांगितले. या उपक्रमात शाळेतील शिक्षक श्री. हणमंत डोलारे, विकास ढंगे, शांताराम कुंभार, श्रीमती सुवर्णा काळे व दिपाली व्होटे यांनीही सक्रिय सहभाग नोंदवत खरेदीचा आनंद घेतला.

दिवसभर चाललेल्या या खरेदी-विक्रीतून विद्यार्थ्यांनी सुमारे १५ हजार रुपये कमावले. या यशस्वी उपक्रमामुळे चव्हाणवाडीच्या विद्यार्थ्यांच्या आत्मविश्वास आणि व्यावसायिक जडणघडणीला मोठी चालना मिळाली आहे.