"Only न्युज धाराशिव" वृत्तसेवा
काटी/उमाजी गायकवाड
तुळजापूर तालुक्यातील काटी येथील ग्रामदैवत श्री भैरवनाथ-जोगेश्वरी मंदिराचा ऐतिहासिक 'कलशारोहण सोहळा' १९ आणि २० मार्च रोजी अत्यंत शाही थाटात आणि भक्तीमय वातावरणात संपन्न झाला. तीन वर्षांच्या अथक परिश्रमानंतर साकारलेल्या या भव्य मंदिराच्या शिखरावर सुवर्णकलश विराजमान झाला असून, या सोहळ्यानिमित्त अवघी काटी नगरी भक्तीरंगात न्हाऊन निघाली होती.
ह.भ.प. सुनील ढगे महाराजांच्या कीर्तनातून उलगडले कलशारोहणाचे महत्त्व
सोहळ्याचे मुख्य आकर्षण ठरलेल्या कीर्तनात ह.भ.प. सुनील ढगे महाराज यांनी संत तुकाराम महाराजांच्या अभंगाचा आधार घेत रसाळ निरूपण केले. "देवालयाचे पूर्णत्व हे त्याच्या शिखरावरून आणि कलशावरून ठरते. जोपर्यंत शिखरावर कलश चढत नाही, तोपर्यंत वास्तू मंदिर होत नाही," असे सांगत त्यांनी कलशारोहणाचे महत्त्व विशद केले.
यावेळी सुश्राव्य किर्तनातून हभप सुनिल ढगे महाराजांनी शास्त्रातील कलशारोहणाचे चार प्रमुख प्रकार सविस्तर मांडले: यामध्ये
१. नील कलश: शांती आणि समृद्धीचे प्रतीक.
२. स्वर्ण कलश: ऐश्वर्य आणि ईश्वरी तेजाचे प्रतीक (जे आज येथे विराजमान झाले).
३. रजत कलश: भक्ती आणि समर्पणाची भावना दर्शवणारे.
४. ताम्र कलश: शक्ती आणि आरोग्याचे द्योतक.
हे चार प्रकार असल्याचे सांगून महाराजांनी पुढे सांगितले की, प्रशांत कुलकर्णी काटीकर यांच्या संकल्पनेतून, नोकरी निमित्त बाहेरगावी असलेले कुलकर्णी परिवारातील सर्व सदस्य एकत्र आले आणि त्यांनी स्वतःच्या घामाच्या पैशातून हे भव्य मंदिर उभे केले. हा 'सामूहिक पुरुषार्थ' समाजासाठी आदर्श असल्याचे त्यांनी नमूद केले.
आरएसएस प्रांतप्रचारक स्वप्निलजी चामणीकर यांचे प्रबोधन
या सोहळ्याला प्रमुख अतिथी म्हणून लाभलेले राष्ट्रीय स्वयंसेवक संघाचे देवगिरी प्रांत प्रचारक श्री. स्वप्निलजी चामणीकर यांनी राष्ट्र आणि धर्म या विषयावर मौलिक मार्गदर्शन केले. त्यांनी संघाच्या कार्याचा आढावा घेताना सांगितले की, "संघाचे कार्य केवळ शाखा लावण्यापुरते मर्यादित नसून, समाज संघटित करणे आणि प्रत्येक व्यक्तीमध्ये राष्ट्रभक्ती जागृत करणे हेच आमचे मुख्य ध्येय आहे. हिंदू धर्म हा केवळ उपासना पद्धती नसून ती एक जीवनशैली आहे." मंदिराच्या जिर्णोद्धारातून गावाची एकी दिसते आणि हीच एकी राष्ट्राला प्रबळ बनवेल, असा विश्वास त्यांनी व्यक्त केला.
या कार्यक्रमाची ठळक वैशिष्ट्ये:
भक्तीरंग: १९ मार्च रोजी चिरंजीव सार्थक बावीकर आणि संचाने सादर केलेल्या सुमधुर भजनांनी श्रोत्यांना मंत्रमुग्ध केले.
कलश यात्रा: २० मार्च रोजी सकाळी माहेरवाशिणींनी डोक्यावर मंगल कलश घेऊन काढलेली दिंडी मिरवणूक गावाच्या आकर्षणाचा केंद्रबिंदू ठरली. टाळ-मृदंगाच्या गजरात लेकी-सुनांनी देवाचा जयघोष केला.
लेकींचा सन्मान: मंदिर ट्रस्टच्या वतीने गावातील माहेरवाशिणींना साडी-चोळी आणि देवीची प्रतिमा देऊन सन्मानित करण्यात आले, ज्यामुळे भावूक वातावरण निर्माण झाले होते.
मान्यवरांची उपस्थिती आणि सत्कार
कार्यक्रमात स्वप्निलजी चामणीकर यांच्यासह पुणे विभागाचे प्रचारक मंगेशजी बडवे, तुळजापूर पंचायत समितीचे नवनिर्वाचित सभापती विक्रमसिंह देशमुख, जि.प. सदस्या सौ. आशाताई ब्रम्हदेव भाले, सरपंच सौ. आशाताई सुजित हंगरगेकर, पत्रकार उमाजी गायकवाड, ॲड. रवींद्र कदम, सुहास कुलकर्णी यांचा यथोचित सत्कार करण्यात आला. महाआरतीनंतर महाप्रसादाने या सोहळ्याची सांगता झाली.
0 Comments