तुळजापूर/उमाजी गायकवाड
जागतिक महिला दिनाचे औचित्य साधून 'दैनिक पुण्यनगरी' आणि 'आपला आवाज आपली सखी' यांच्या संयुक्त विद्यमाने पुण्यात आयोजित करण्यात आलेल्या दिमाखदार सोहळ्यात, धाराशिवच्या प्रसिद्ध उद्योजक घराण्यातील कन्या सौ. अर्पिता डूरे-पाटील यांना 'कर्तृत्वसंपन्न महिला सन्मान' देऊन गौरविण्यात आले. तुळजापूर तालुक्यातील काटी येथील सुपुत्र तथा नामवंत उद्योजक अमरसिंह देशमुख यांच्या त्या कन्या आहेत.
पुण्यातील एका भव्य समारंभात विविध क्षेत्रांतील मान्यवरांच्या उपस्थितीत हा पुरस्कार प्रदान करण्यात आला. अर्पिता डूरे-पाटील यांनी उद्योग क्षेत्रात स्वतःच्या कष्टाने आणि जिद्दीने निर्माण केलेल्या स्वतंत्र ओळखीची दखल घेऊन हा बहुमान त्यांना बहाल करण्यात आला.
मान्यवरांची उपस्थिती आणि सोहळ्याचा थाट
या गौरव सोहळ्याला पुण्याच्या महापौर मंजुषा नागपुरे, 'सुपर डुपर' चित्रपटाची स्टार कास्ट विदुला चौगुले आणि प्रतीक्षा कोटे, 'भिडेवाडा' चित्रपटाची स्टार कास्ट, दिग्दर्शिका शिवानी राजेशिर्के, निर्माती जयश्री शिरोळे, अभिनेते सम्राट अजित शिरोळे यांच्यासह झी स्टुडिओ (Z Studios) आणि 'दैनिक पुण्यनगरी' परिवारातील अनेक दिग्गज उपस्थित होते.
कर्तृत्वाचा यथोचित सन्मान
एका उद्योजक पार्श्वभूमीतून आल्यानंतरही अर्पिताजींनी आपल्या कामातून एक वेगळा ठसा उमटवला आहे. हा सन्मान स्वीकारताना त्यांनी कृतज्ञता व्यक्त केली. त्या म्हणाल्या की, "हा पुरस्कार केवळ माझा सन्मान नाही, तर माझ्या कामावर ठेवलेला विश्वास आहे. पुण्यनगरी आणि संगीताताई तरडे यांनी दिलेले हे व्यासपीठ महिलांना नवी ऊर्जा आणि आत्मविश्वास देणारे आहे."
या यशामुळे तुळजापूर तालुक्यातील काटी आणि धाराशिव जिल्ह्यातून त्यांच्यावर अभिनंदनाचा वर्षाव होत आहे. महिला दिनाच्या निमित्ताने एका ग्रामीण भागाशी नाळ जोडलेल्या कन्येने पुण्यासारख्या शहरात आपल्या कर्तृत्वाचा झेंडा फडकवल्याने सर्वत्र कौतुक होत आहे.
0 Comments