तुळजापूर | "Only न्युज धाराशिव" वृत्तसेवा
महाराष्ट्राची कुलस्वामिनी श्री तुळजाभवानी देवीच्या चैत्र पौर्णिमा महोत्सवानिमित्त तुळजापूर नगरी भक्तीच्या रंगात न्हाऊन निघाली आहे. उद्या, २ एप्रिल २०२६ रोजी मुख्य उत्सव होत असून, आजपासूनच लाखो भाविकांनी तुळजापुरात गर्दी केली आहे. मंदिर परिसरातील 'राजे शहाजी महाद्वार' आणि आजूबाजूच्या बाजारपेठा भाविकांच्या गर्दीने फुलून गेल्याचे चित्र पाहायला मिळत आहे.
प्रशासनाची जय्यत तयारी: २२ तास मंदिर उघडे
वाढती गर्दी लक्षात घेता जिल्हा प्रशासन आणि मंदिर संस्थानने कडेकोट नियोजन केले आहे. भाविकांना जास्तीत जास्त वेळ दर्शन मिळावे यासाठी मंदिर दिवसातील २२ तास खुले ठेवण्याचा महत्त्वपूर्ण निर्णय घेण्यात आला आहे. दर्शनासाठी येणाऱ्या भाविकांना उन्हाचा तडाखा बसू नये, म्हणून दर्शन रांगेत कुलर आणि पंख्यांची व्यवस्था करण्यात आली आहे.
'व्हीआयपी' दर्शन बंद; सामान्यांना प्राधान्य
यंदा प्रशासनाने एक महत्त्वाचा बदल केला असून, गर्दीचे योग्य नियोजन करण्यासाठी ५०० रुपयांचे विशेष (VIP) दर्शन पास पूर्णपणे बंद ठेवले आहेत. यामुळे सर्वसामान्य भाविकांना समान वेळेत आणि सुलभतेने दर्शन मिळण्यास मदत होत आहे. सध्याच्या अंदाजानुसार, मुखदर्शनासाठी साधारण ३ तास, तर धर्मदर्शनासाठी ६ तासांचा वेळ लागत आहे.
सुरक्षा आणि सुविधांवर भर
जिल्हाधिकारी कीर्ती किरण पुजारी यांनी दिलेल्या माहितीनुसार, स्वच्छता, आरोग्य आणि सुरक्षा या त्रिसूत्रीवर भर देण्यात आला आहे. शहरात ठिकठिकाणी वैद्यकीय कक्ष आणि रुग्णवाहिका तैनात आहेत. सुरक्षेसाठी मोठ्या प्रमाणात पोलीस बंदोबस्त तैनात करण्यात आला असून, सीसीटीव्हीद्वारे गर्दीवर लक्ष ठेवले जात आहे.
भक्तीचा जनसागर
तुळजापूरचे मुख्य प्रवेशद्वार आणि मंदिर परिसरातील रस्ते भाविकांनी गजबजले आहेत. हातात पूजेचे ताट, डोक्यावर देवीची ओटी आणि मुखात 'आई राजा उदो-उदो'चा जयघोष करत भाविक श्रद्धेने रांगेत उभे आहेत. बिडकर पायऱ्यांमार्गे भाविकांना प्रवेश दिला जात असून, पारंपरिक पद्धतीने होणार ,छबिना हे यंदाच्या उत्सवाचे मुख्य आकर्षण असणार आहेत.
भाविकांना आवाहन: उन्हाळा लक्षात घेता भाविकांनी स्वतःसोबत पाणी आणि आवश्यक औषधे ठेवावीत. तसेच प्रशासनाने आखून दिलेल्या नियमांचे पालन करून दर्शन सोहळा निर्विघ्न पार पाडण्यासाठी सहकार्य करावे, असे आवाहन मंदिर संस्थानने केले आहे.
0 Comments