"Only न्युज धाराशिव" वृत्तसेवा
तुळजापूर | उमाजी गायकवाड
"भारतरत्न डॉ. बाबासाहेब आंबेडकर यांनी देशाला दिलेले संविधान हे केवळ कायदेशीर दस्तऐवज नसून ते आजच्या काळातील खरे 'धर्मशास्त्र' आहे. समता, स्वातंत्र्य आणि न्यायाची मूल्ये समाजात रुजली तरच खऱ्या अर्थाने बाबासाहेबांना अभिप्रेत असलेला भारत घडेल. विशेषतः त्यांनी कामगार आणि शेतकऱ्यांच्या हितासाठी घेतलेले ऐतिहासिक निर्णय आजही देशाच्या प्रगतीचे सुरक्षाकवच आहेत," असे प्रतिपादन प्रख्यात व्याख्याते आणि संशोधक प्रो. डॉ. मनोहर शिरसाट (बीड) यांनी येथे केले.
क्रांतीसूर्य महात्मा ज्योतिबा फुले व भारतरत्न डॉ. बाबासाहेब आंबेडकर यांच्या संयुक्त जयंती महोत्सवाचे औचित्य साधून महावितरण विभागीय कार्यालय, तुळजापूर येथे 'ॲक्रेलिक प्रतिमा लोकार्पण' सोहळा मोठ्या उत्साहात पार पडला. यावेळी प्रमुख वक्ते म्हणून डॉ. शिरसाट बोलत होते.
कामगार कल्याणाचे जनक: डॉ. शिरसाट
आपल्या ओघवत्या शैलीत मार्गदर्शन करताना डॉ. शिरसाट म्हणाले की, १९४२ ते १९४६ या काळात कामगार मंत्री असताना बाबासाहेबांनी घेतलेले निर्णय आजही तितकेच प्रासंगिक आहेत. कामाचे तास १४ वरून ८ करणे, समान कामासाठी समान वेतन, महागाई भत्ता, महिलांसाठी भरपगारी प्रसूती रजा आणि किमान वेतन कायदा ही बाबासाहेबांची देणगी आहे. आजच्या महागाई आणि बेरोजगारीच्या काळात श्रमिकांच्या हक्कांचे संरक्षण करण्यासाठी बाबासाहेबांच्या विचारांशिवाय पर्याय नाही.
संविधान हेच जीवनाचे मूल्य: डॉ. मुरहरी केळे
कार्यक्रमाचे प्रमुख पाहुणे आणि त्रिपुरा राज्य वीज मंडळाचे माजी व्यवस्थापकीय संचालक डॉ. मुरहरी केळे यांनी फुले-आंबेडकरी विचारांची गरज अधोरेखित केली. ते म्हणाले, "संविधानातील मूल्ये केवळ कागदावर न राहता ती प्रत्येकाच्या आचरणात येणे आवश्यक आहे. बंधुभाव आणि सामाजिक न्याय या पायावरच प्रगत समाजाची उभारणी होऊ शकते." डॉ. केळे यांनी महावितरणच्या माध्यमातून सामाजिक बांधिलकी जपणाऱ्या या उपक्रमाचे कौतुक केले.
मान्यवरांची मांदियाळी
कार्यक्रमाचे अध्यक्षपद कार्यकारी अभियंता मा. श्री. नंदकुमार काळे यांनी भूषवले. या सोहळ्याला महावितरणचे अधीक्षक अभियंता मा. श्री. संजय आडे, मुख्य अभियंता मा. श्री. अरविंद बुलबुले, आणि विद्युत ठेकेदार संघटनेचे अध्यक्ष मा. श्री. विशाल (दादा) शिंगाडे यांची प्रमुख उपस्थिती होती.
याप्रसंगी व्यासपीठावर महावितरणचे विविध विभागांचे अधिकारी सर्वश्री स्वप्निल वाणी, दीपक कोथले, राहुल पवार, प्रवीण बगाडे, दिलीप अकोसकर, देवानंद सुरवसे, हंबिरे साहेब, नामदेव माळी,यांसह जिल्ह्यातील कर्मचारी, अधिकारी उपस्थित होते.
कार्यक्रमाचे नेटके आयोजन महावितरण सार्वजनिक जयंती उत्सव समिती, तुळजापूर (२०२६) यांच्या वतीने करण्यात आले होते. प्रतिमा लोकार्पणानंतर सर्व उपस्थित मान्यवर आणि कर्मचाऱ्यांसाठी स्नेहभोजनाचे आयोजन करण्यात आले होते. या कार्यक्रमामुळे परिसरात विचारांचे चैतन्य निर्माण झाले आहे.
0 Comments