🚨 तुळजाभवानी मंदिर परिसरात तंबाखूविरोधी कोटपा कायद्याअंतर्गत कारवाई; २४ जणांवर दंड, 🚫 ‘नो टोबॅको झोन’मध्ये उल्लंघन; तुळजापूरात २४ जणांवर दंडात्मक कारवाई; ४,६५० रुपये वसूल. 📢 भाविकांसाठी इशारा! मंदिर परिसरात तंबाखू सेवन केल्यास थेट दंड

तुळजापूर | "Only  न्युज धाराशिव" वृत्तसेवा 

 श्री तुळजाभवानी मंदिर परिसरात तंबाखूजन्य पदार्थांचे सेवन करणाऱ्यांविरुद्ध प्रशासनाने कठोर भूमिका घेत विशेष धाड सत्र राबवले. मंगळवार (१४ एप्रिल) रोजी पार पडलेल्या या कारवाईत कोटपा (COTPA) कायद्याअंतर्गत एकूण २४ जणांवर दंडात्मक कारवाई करण्यात आली.

या मोहिमेदरम्यान सार्वजनिक ठिकाणी धूम्रपान व तंबाखू सेवन करणाऱ्यांवर कोटपा कायद्याच्या कलम ४, ६ (A) व ६ (B) अंतर्गत कारवाई करण्यात आली. मंदिर परिसरातील २२ तर मंदिर प्रशासकीय इमारतीतील २ अशा एकूण २४ व्यक्तींवर कारवाई करत प्रशासनाने ४,६५० रुपये इतका दंड वसूल केला आहे.

या कारवाईत जिल्हा आरोग्य विभागातील अधिकारी व कर्मचारी तसेच मंदिर संस्थानच्या स्वच्छता व सुरक्षा विभागाने सक्रिय सहभाग घेतला. संयुक्त पथकाने मंदिर परिसरात अचानक धाड टाकत नियमांचे उल्लंघन करणाऱ्यांवर कारवाई केली.

मंदिर प्रशासनाने भाविकांना स्पष्ट आवाहन केले आहे की, मंदिर परिसर हा पवित्र व सार्वजनिक ठिकाण असल्याने येथे तंबाखूजन्य पदार्थांचे सेवन करू नये. परिसरात कोणी थुंकताना आढळल्यास त्याचा फोटो काढून ९०९६८५२७२५ या व्हॉट्सअ‍ॅप क्रमांकावर पाठवण्याचे आवाहन करण्यात आले आहे. प्राप्त तक्रारींवर तात्काळ कायदेशीर कारवाई केली जाणार आहे.तसेच, स्वच्छता राखण्यासाठी मंदिर परिसरात सूचना फलक लावण्यात आले असून भाविकांनी नियमांचे पालन करून स्वच्छतेस सहकार्य करावे, असेही प्रशासनाकडून सांगण्यात आले आहे.