काटी येथे ‘श्री ज्ञानप्रबोधिनी वारकरी शिक्षण संस्था’ इमारतीचे भक्तिमय वातावरणात दिमाखदार भूमिपूजन; वारकरी संप्रदायातील दिग्गजांची मांदियाळी; समाजप्रबोधन व नैतिक मूल्यांच्या जपणुकीसाठी अध्यात्मिक शिक्षणाची गरज – ह.भ.प. संदीपान महाराज हासेगावकर

'श्री ज्ञानप्रबोधिनी वारकरी शिक्षण संस्था' इमारतीचे भूमिपूजन करताना संस्थेचे अध्यक्ष ह.भ.प. संदीपान महाराज हासेगावकर. समवेत मृदंगाचार्य कृष्णा महाराज कदम, सभापती विक्रमसिंह देशमुख, जिल्हा परिषद सदस्य बाळासाहेब भाले, सरपंच सुजित हंगरगेकर, महादेव जाधव, सयाजीराव देशमुख वारकरी संप्रदायातील दिग्गज 

 व इतर मान्यवर.

'Only न्युज धाराशिव' वृत्तसेवा 

काटी | उमाजी गायकवाड 

ग्रामीण भागातील बालमनांवर सुसंस्कारांचे शिंपण करत पारंपरिक वारकरी संप्रदायाचे अधिष्ठान, मृदंग-गायन विद्या आणि अध्यात्मिक ज्ञानाची भक्कम पायाभरणी करण्याच्या उद्देशाने काटी (ता. तुळजापूर) येथे उभारण्यात येणाऱ्या ‘श्री ज्ञानप्रबोधिनी वारकरी शिक्षण संस्थेच्या’ नवीन भव्य इमारतीचा शिलान्यास (भूमिपूजन) सोहळा बुधवार, दि. २६ ऑगस्ट २०२६ रोजी अत्यंत उत्साहात व पावन वातावरणात संपन्न झाला. जवळगाव रोड येथील प्रस्तावित प्रांगणात पार पडलेल्या या सोहळ्यास संपूर्ण राज्यभरातून आलेल्या वारकरी संप्रदायातील ज्येष्ठ संत, महंत आणि कीर्तनकारांच्या उपस्थितीमुळे विशेष वलय प्राप्त झाले होते.

वारकरी शिक्षण संस्थेचे अध्यक्ष ह.भ.प. संदीपान महाराज हासेगावकर यांच्या शुभहस्ते आणि ज्ञानप्रबोधिनी शिक्षण संस्थेचे अध्यक्ष तथा प्रख्यात मृदंगाचार्य कृष्णा महाराज कदम यांच्या अध्यक्षतेखाली हा भूमिपूजन सोहळा पार पडला. वेदशास्त्रसंपन्न मंत्रोच्चारात भूमिपूजनाचा मुख्य विधी पूर्ण करण्यात आला.

‘छत्रपती शिवरायांच्या स्वराज्याचा पाया वारकरी विचारांवरच आधारित’

भूमिपूजनानंतर आयोजित धर्मसभेत मार्गदर्शन करताना ह.भ.प. संदीपान महाराज हासेगावकर म्हणाले, "सध्याच्या आधुनिक पण दिशाहीन होत चाललेल्या समाजात नैतिकतेचे अधिष्ठान टिकवून ठेवण्यासाठी सांप्रदायिक विचारांची नितांत गरज आहे. आजच्या काळात बिघडलेल्या सामाजिक व्यवस्थेला सन्मार्गावर आणण्याची आणि युवा पिढीला सुसंस्कृत करण्याची अद्वितीय ताकद केवळ वारकरी संप्रदायातच आहे. छत्रपती शिवाजी महाराजांनी देखील संत तुकाराम महाराज विचारांतून प्रेरणा घेऊनच स्वराज्य उभे केले, म्हणूनच आज संपूर्ण जगभरात त्यांचे पुतळे व गौरव उभा राहिला आहे. मृदंगाचार्य कृष्णा महाराज कदम यांनी या शिक्षण संस्थेच्या माध्यमातून ग्रामीण भागात संस्कारांची पेरणी करण्याचे जे व्रत हाती घेतले आहे, ते अत्यंत कौतुकास्पद व वाखाणण्याजोगे आहे."

प्रमुख उपस्थितांच्या विशेष प्रतिक्रिया

"ग्रामीण भागातील विद्यार्थ्यांना संप्रदायाची शिस्त व संगीताचे ज्ञान मिळावे"

"ग्रामीण भागातील गुणवंत विद्यार्थ्यांना वारकरी संप्रदायाची समृद्ध परंपरा, मृदंग व गायन विद्या आणि अध्यात्मिक मूल्यांचे संस्कार वेळेत मिळावेत, हा या संस्थेच्या स्थापनेचा मुख्य हेतू आहे. काटी आणि परिसरातील तरुण पिढीला या माध्यमातून ज्ञानाची व भक्तीची नवी दिशा मिळेल आणि संपूर्ण परिसरात अध्यात्मिक वातावरण दृढ होईल."

— मृदंगाचार्य कृष्णा महाराज कदम (अध्यक्ष, ज्ञानप्रबोधिनी शिक्षण संस्था)

"ग्रामीण भागाच्या अध्यात्मिक व सांस्कृतिक विकासाला गती मिळेल"

"काटी येथे सुरु होत असलेली ही वारकरी शिक्षण संस्था केवळ इमारतीचे बांधकाम नसून, आपल्या तालुक्यासाठी आणि ग्रामीण भागासाठी संस्कारांचे केंद्र ठरणार आहे. भावी पिढीवर उच्च नैतिक मूल्ये रुजवण्यासाठी अशा संस्थांना स्थानिक पातळीवरून आणि प्रशासकीय व सामाजिक माध्यमातून सर्वतोपरी सहकार्य केले जाईल."

— विक्रमसिंह देशमुख (सभापती, पंचायत समिती तुळजापूर)

"काटी ग्रामस्थांसाठी भूषणावह व ऐतिहासिक क्षण"

"ज्ञानप्रबोधिनी वारकरी शिक्षण संस्थेची उभारणी आपल्या काटी गावात होत असणे ही समस्त ग्रामस्थांसाठी अत्यंत अभिमानास्पद बाब आहे. यामुळे आपल्या गावाचा नावलौकिक वाढेलच, शिवाय स्थानिक विद्यार्थ्यांना गावच्या वेशीवरच वारकरी कला व अध्यात्मिक शिक्षणाची उत्तम सोय उपलब्ध होणार आहे. या पवित्र कार्यासाठी ग्रामपंचायतीचे पूर्ण सहकार्य राहील."

— सुजित हंगरगेकर (सरपंच, काटी)

नवीन शैक्षणिक इमारतीचे वैशिष्ट्ये व उद्देश:

पारंपरिक व आधुनिकतेचा संगम: संस्थेत विद्यार्थ्यांना पारंपरिक वारकरी शिक्षण पद्धतीसोबतच चरित्रनिर्माण करणारे धडे दिले जातील.

संगीत व कला साधना: मृदंग वादन, गायन विद्या आणि कीर्तन कलेचे शास्त्रशुद्ध शिक्षण देण्यासाठी विशेष प्रशिक्षकांची सोय असेल.

अध्यात्मिक केंद्र: परिसरातील तरुण व विद्यार्थ्यांमध्ये नैतिक मूल्ये दृढ करून अध्यात्मिक वातावरण निर्माण करणे हा या प्रकल्पाचा मुख्य हेतू आहे.

वारकरी जगतातील मान्यवरांची मांदियाळी

या सोहळ्यास माणकोजी महाराज बोधले (धामणगाव) यांचे वंशज ह.भ.प. जयवंत महाराज बोधले, वारकरी आचारसंहिता परिषदेचे राज्य अध्यक्ष ह.भ.प. निलेश महाराज झरेगावकर, जोग महाराज शिक्षण संस्थेचे विश्वस्त अनिल महाराज पाटील, दत्ता आश्रम (सांगवी) चे श्रीगुरु राम भाऊ काजळे, ह.भ.प. संदीपान महाराज शिंदे, ह.भ.प. कुमार महाराज केमधारणीकर, ह.भ.प. सुनील महाराज ढगे, ह.भ.प. राजन महाराज काशीद, मनोहर कदम, उद्योजक राम खराडे यांची प्रमुख उपस्थिती लाभली.

तसेच जिल्हा परिषद सदस्य बाळासाहेब भाले, भाजप तालुकाध्यक्ष महादेव जाधव, माजी चेअरमन सयाजीराव देशमुख, कृषी उत्पन्न बाजार समितीचे माजी सभापती झुंबर जाधव, ॲड. गजानन चौगुले, केशव जगताप, धनंजय काशीद आणि त्रिगुणशील साळुंके यांच्यासह परिसरातील नागरिक व भाविक मोठ्या संख्येने उपस्थित होते.

कार्याचा गौरव: भूमिपूजन सोहळ्यात ज्ञानप्रबोधिनी संस्थेचे अध्यक्ष मृदंगाचार्य कृष्णा महाराज कदम यांचा ह.भ.प. संदीपान महाराज हासेगावकर यांच्या हस्ते 'माणकोजी महाराज बोधले' यांची प्रतिमा देऊन सत्कार करण्यात आला. 

विशेष सत्कार सोहळा

या सोहळ्यादरम्यान वारकरी संप्रदायातील दिग्गजांच्या हस्ते मृदंगाचार्य कृष्णा महाराज कदम यांच्या निष्ठापूर्वक कार्याचा गौरव म्हणून त्यांना ‘माणकोजी महाराज बोधले श्रीक्षेत्र धामणगाव’ यांची अत्यंत देखणी प्रतिमा प्रदान करून विशेष सत्कार करण्यात आला. तसेच काटी ग्रामस्थांच्या वतीने पंचायत समिती सभापती विक्रमसिंह देशमुख यांच्या हस्ते उपस्थित सर्व संत-महंतांचा व मान्यवरांचा शाल व श्रीफळ देऊन भावपूर्ण सत्कार करण्यात आला.

कार्यक्रमाचे सूत्रसंचालन सरपंच  सुजित हंगरगेकर व आभार प्रदर्शन आयोजक मृदंगाचार्य कृष्णा महाराज कदम यांनी केले असून अल्पोपहाराने सोहळ्याची सांगता झाली.