'Only न्युज धाराशिव' वृत्तसेवा
काटी | उमाजी गायकवाड
धाराशिव जिल्हा परिषद अध्यक्षा सौ. अर्चनाताई पाटील यांच्या कल्पनेतून संपूर्ण जिल्ह्यात राबविल्या जात असलेल्या ‘आपला जीव, धाराशिव’ अभियानाला सर्वत्र उत्स्फूर्त प्रतिसाद मिळत आहे. याच अभियानाचा एक भाग म्हणून काटी (ता. तुळजापूर) येथील जिल्हा परिषद प्राथमिक शाळेला काटी जि. प. गटाच्या सदस्या सौ. आशाताई भाले यांचे प्रतिनिधी व माजी ग्रामपंचायत सदस्य श्री. बाळासाहेब भाले यांनी सदिच्छा भेट दिली.
या भेटीदरम्यान त्यांनी शाळा व्यवस्थापनाशी संवाद साधत विद्यार्थ्यांच्या शैक्षणिक गुणवत्तेचा आणि विविध सोयी-सुविधांचा आढावा घेतला.
‘रात्री ७ ते ९ मोबाईल बंद ठेवा’ — पालकांना व विद्यार्थ्यांना आवाहन
विद्यार्थ्यांचे अभ्यासातील लक्ष केंद्रित व्हावे आणि मोबाईलच्या अतिवापरापासून त्यांची मुक्तता व्हावी, यासाठी रात्री ७ ते ९ या वेळेत घरातील मोबाईल बंद ठेवून मुलांचा अभ्यास घेण्याचे आवाहन बाळासाहेब भाले यांनी केले.
गुणवत्ता वाढ व पटसंख्येसाठी महत्त्वपूर्ण सूचना
पटसंख्या वाढीवर भर: जिल्हा परिषद शाळेत पटसंख्या कशी वाढवता येईल, यासाठी शिक्षक आणि ग्रामस्थांनी समन्वयाने काम करावे.
गुणवत्ता विकास: आपल्या शाळेतील विद्यार्थी शैक्षणिक गुणवत्तेत केवळ जिल्ह्यातच नव्हे, तर राज्य पातळीवर कसे चमकतील, या दृष्टीने योग्य ते नियोजन करावे.
शिक्षक व ग्रामस्थांचा सहभाग: शाळेच्या सर्वांगीण विकासासाठी शिक्षक स्टाफ आणि गावकऱ्यांनी संयुक्तपणे जबाबदारी घेण्याचे आवाहन त्यांनी केले.
अडीअडचणींची पाहणी व तात्काळ सूचना
शाळा भेटीदरम्यान त्यांनी संपूर्ण इमारतीची व दुरुस्ती कामांची पाहणी केली. तसेच, शाळेतील पिण्याच्या पाण्याचे बंद पडलेले वॉटर फिल्टर तात्काळ दुरुस्त करून २ दिवसांत चालू करण्याच्या स्पष्ट सूचना संबंधित प्रशासनाला दिल्या.
मान्यवरांची उपस्थिती
या प्रसंगी काटी जि. प. शाळेचे मुख्याध्यापक, माजी उपसरपंच श्री. संपत पंके यांच्यासह शाळेतील सर्व शिक्षकवृंद, कर्मचारी आणि स्थानिक ग्रामस्थ मोठ्या संख्येने उपस्थित होते.
0 Comments