सामाजिक कार्य क्षेत्रात महत्त्वाकांक्षी पाऊल: 'स्वाआतीम' विद्यापीठ आणि भटके विमुक्त विकास प्रतिष्ठान यांच्यात सामंजस्य करार; ​विद्यार्थ्यांना मिळणार प्रत्यक्ष क्षेत्रकामाचा आणि संशोधनाचा अनुभव; एमएसडब्ल्यूच्या विद्यार्थ्यांना भटके-विमुक्त समाजाच्या समस्यांचा जवळून अभ्यास करता येणार​

'Only न्युज धाराशिव' वृत्तसेवा 

तुळजापूर | उमाजी गायकवाड 

स्वामी रामानंद तीर्थ मराठवाडा विद्यापीठ आणि सोलापूर येथील भटके विमुक्त विकास प्रतिष्ठान यांच्यात सामाजिक कार्य, क्षेत्रीय अध्ययन, संशोधन आणि विद्यार्थ्यांच्या व्यावहारिक प्रशिक्षणाला चालना देण्यासाठी गुरुवारी (२० ऑगस्ट) सामंजस्य करार (MoU) करण्यात आला.

​या सामंजस्य करारावर स्वामी रामानंद तीर्थ मराठवाडा विद्यापीठाच्या वतीने कुलसचिव डॉ. डी. डी. पवार आणि भटके विमुक्त विकास प्रतिष्ठानच्या वतीने अध्यक्ष उद्धवराव विश्वनाथ काळे यांनी स्वाक्षऱ्या केल्या. या प्रसंगी विद्यापीठाचे कुलगुरू डॉ. मनोहर चासकर, प्र-कुलगुरू डॉ. अशोक महाजन, व्यवस्थापन परिषद सदस्य डॉ. प्रशांत पेशकार, प्रेमानंद शिंदे, उमेश जोशी, सामाजिकशास्त्र संकुलाचे संचालक डॉ. प्रमोद लोणकर तसेच नवउपक्रम, नवसंशोधन व साहचर्य मंडळाचे संचालक डॉ. शैलेश वाढेर उपस्थित होते.

​

सैद्धांतिक ज्ञानाला प्रत्यक्ष अनुभवाची जोड: कुलगुरू डॉ. मनोहर चासकर

या वेळी बोलताना कुलगुरू डॉ. मनोहर चासकर यांनी सांगितले की, "या सामंजस्य करारामुळे एमएसडब्ल्यू (Master of Social Work) च्या विद्यार्थ्यांना वर्गातील सैद्धांतिक ज्ञानाची प्रत्यक्ष क्षेत्रीय अनुभवाशी सांगड घालण्याची महत्त्वपूर्ण संधी मिळणार आहे. Fieldwork, One Month Block Placement, Guest Lectures आणि Joint Research Projects यांच्या माध्यमातून विद्यार्थ्यांना भटके व विमुक्त समाजाच्या वास्तविक समस्या, गरजा आणि विकासाच्या आव्हानांचा जवळून अभ्यास करता येईल. यामुळे विद्यार्थ्यांमध्ये सामाजिक संवेदनशीलतेसोबतच संशोधन, संवाद, नेतृत्व आणि समस्या-निराकरणाच्या कौशल्यांचा विकास होईल."

​कराराची प्रमुख वैशिष्ट्ये व उपक्रम:

​विद्यार्थ्यांसाठी संधी: सामाजिकशास्त्र संकुलातील सामाजिक विज्ञान व आंतरविद्या शाखेच्या MSW प्रथम व द्वितीय वर्षाच्या विद्यार्थ्यांसाठी विविध शैक्षणिक व क्षेत्राधारित उपक्रम राबवले जातील.

​व्यावहारिक प्रशिक्षण: यामध्ये Fieldwork, One Month Block Placement, Guest Lectures आणि संयुक्त संशोधन प्रकल्प (Joint Research Project) यांचा समावेश असेल.

​सामाजिक अभ्यास: विद्यार्थ्यांना भटके व विमुक्त समाजाच्या सामाजिक, शैक्षणिक, आर्थिक आणि विकासात्मक प्रश्नांचा प्रत्यक्ष क्षेत्रात अभ्यास करण्याची संधी लाभेल.

​या उपक्रमामुळे विद्यापीठाच्या क्षेत्रिय साधनांचा आणि प्रतिष्ठानच्या समृद्ध अनुभवाचा समन्वय साधून विद्यार्थ्यांच्या कौशल्यविकासाला तसेच समाजाभिमुख संशोधनाला मोठे प्रोत्साहन मिळणार आहे.