धाराशिव/उमाजी गायकवाड
महाराष्ट्र राज्य मार्ग परिवहन महामंडळाने (ST) प्रवाशांच्या सोयीसाठी एक क्रांतिकारी पाऊल उचलले असून, आता एसटी प्रवासासाठी NCMC (National Common Mobility Card) प्रणाली लागू करण्याचा निर्णय घेतला आहे. या निर्णयामुळे प्रवाशांना आता 'एक देश, एक कार्ड' या संकल्पनेनुसार प्रवास करता येणार आहे.
एसटी महामंडळाने आपल्या प्रवाशांना डिजिटल युगाशी जोडण्यासाठी एक मोठा निर्णय घेतला आहे. आता एसटी बसमधून प्रवास करताना खिशात रोख रक्कम ठेवण्याची गरज भासणार नाही. मेट्रो आणि रेल्वेप्रमाणेच आता एसटीमध्येही 'नॅशनल कॉमन मोबिलिटी कार्ड' (NCMC) चालणार आहे.
काय आहे ही नवीन प्रणाली?
नॅशनल कॉमन मोबिलिटी कार्ड हे केंद्र सरकारचे एक महत्त्वाकांक्षी पाऊल आहे. हे कार्ड केवळ एसटी प्रवासासाठीच नाही, तर मेट्रो, लोकल ट्रेन, टोल नाके आणि अगदी खरेदीसाठी देखील वापरता येते. एसटीने आता आपल्या तिकीट यंत्रणेत सुधारणा करून हे कार्ड स्वीकारण्याची तयारी पूर्ण केली आहे.
या नवीन प्रणालीमुळे सुट्टे पैसे व त्यावरुन होणारे वाद थांबतील, वेळेची बचत होईल व प्रवाशांना कार्ड टॅप करून डिजिटल पद्धतीने तिकीट काढता येईल.
अंमलबजावणी कधीपासून?
एसटी महामंडळाने त्यांच्या नवीन अँड्रॉइड आधारित तिकीट मशिनमध्ये हे तंत्रज्ञान आधीच समाविष्ट केले आहे. येत्या काही दिवसांत प्रायोगिक तत्त्वावर काही विभागांमध्ये याची सुरुवात होईल आणि त्यानंतर संपूर्ण महाराष्ट्रात ही सेवा लागू केली जाईल.एसटी महामंडळ देखील लवकरच प्रमुख बस स्थानकांवर विशेष काउंटर सुरू करणार आहे, जिथे प्रवाशांना हे कार्ड जागेवरच काढून मिळेल.
"प्रवाशांचा प्रवास अधिक सुसह्य आणि आधुनिक करण्यासाठी एसटी महामंडळ कटिबद्ध आहे. NCMC कार्डमुळे पारदर्शकता वाढेल आणि प्रवाशांना डिजिटल पेमेंटचा सुरक्षित पर्याय मिळेल." — एसटी प्रशासन
0 Comments