🚩 Only न्यूज धाराशिव: विशेष राजकीय घडामोडी; धाराशिव झेडपीचा 'कलगीतुरा': भाजपची कोकण वारी, तर भाजपला रोखण्यासाठी सेना-शिवसेना एकत्र येण्याच्या तयारीत!

धाराशिव/उमाजी गायकवाड 

जिल्हा परिषद निवडणुकीचे निकाल जाहीर झाल्यानंतर आता खऱ्या अर्थाने अध्यक्षपदासाठी राजकीय सारीपाट मांडला जात आहे. भाजपचे आमदार राणाजगजितसिंह पाटील यांनी आपल्या गटातील विजयी उमेदवारांना कोकणात 'सहल' (सहलीवर) नेल्याने चर्चेला उधाण आले असतानाच, दुसरीकडे त्यांना रोखण्यासाठी धाराशिवमध्ये नव्या समीकरणांच्या हालचालींना वेग आला आहे.

📍 भाजपची 'कोकण वारी' आणि फिल्डिंग

जिल्हा परिषदेत स्पष्ट बहुमत मिळवण्यासाठी किंवा आपले संख्याबळ टिकवण्यासाठी भाजपने सावध पवित्रा घेतला आहे. सूत्रांच्या माहितीनुसार, फोडाफोडीचे राजकारण टाळण्यासाठी आणि आपल्या गोटातील सदस्य एकत्र ठेवण्यासाठी भाजपचे आमदार राणाजगजितसिंह पाटील व जिल्ह्यातील नेत्यांनी विजयी उमेदवारांना कोकणात सुरक्षित स्थळी हलवले आहे. अध्यक्षपदाच्या निवडणुकीपर्यंत हे सदस्य 'नॉटreachable' राहण्याची शक्यता वर्तवण्यात येत आहे.

🤝 शिंदे आणि ठाकरे गट एकत्र येणार?

एकीकडे भाजप आपले संख्याबळ सांभाळत असताना, धाराशिव जिल्हा परिषदेवर आपला अध्यक्ष बसवण्यासाठी आमदार तानाजी सावंत शिवसेना (शिंदे गट) आणि खासदार ओमराजे निंबाळकर, आमदार कैलास पाटील शिवसेना (ठाकरे गट) यांच्यात पडद्यामागून हालचाली सुरू असल्याची चर्चा आहे. भाजपला सत्तेपासून दूर ठेवण्यासाठी जिल्ह्यातील दोन्ही शिवसेनेचे स्थानिक नेते एकत्र येण्याची शक्यता राजकीय वर्तुळात बोलली जात आहे. जर असे झाले, तर जिल्ह्याच्या राजकारणात ही एक मोठी उलथापालथ ठरेल.

⚔️ आरोप-प्रत्यारोपांच्या फैरी

या घडामोडींमुळे जिल्ह्यातील राजकीय वातावरण चांगलेच तापले आहे. "भाजपला लोकशाहीवर विश्वास नाही, म्हणूनच ते उमेदवारांची कोकण वारी करत आहेत," अशी टीका विरोधकांकडून होत आहे. तर दुसरीकडे, "विकासकामांच्या जोरावर जनता आमच्या पाठीशी आहे आणि आमचाच अध्यक्ष होईल," असा विश्वास भाजप समर्थकांकडून व्यक्त केला जात आहे.

🧐 कोणाचे पारडे जड?

जिल्हाध्यक्ष पदाच्या खुर्चीवर बसण्यासाठी सध्या तरी भाजपचे पारडे जड असून 31 पेक्षा जिल्हा परिषद उमेदवार कोकण वारीमध्ये असल्याची चर्चा आहे. भाजपला रोखण्यासाठी दोन्ही शिवसेना काय डाव टाकतात अपक्ष, समाजवादी पार्टीचा एक उमेदवार कोणाच्या पाठीशी राहतात यावर सर्व गणिते अवलंबून असणार आहेत. राणाजगजितसिंह पाटील यांची रणनीती यशस्वी होणार की शिंदे-ठाकरे यांच्या संभाव्य युतीमुळे भाजपला धक्का बसणार? याकडे संपूर्ण जिल्ह्याचे लक्ष लागले आहे.