🏆 सरस्वती विद्यालय तामलवाडीचा एनएमएमएस परीक्षेत झेंडा! ९ विद्यार्थ्यांचे घवघवीत यश 🏆

काटी/उमाजी गायकवाड 

तुळजापूर तालुक्यातील तामलवाडी येथील सरस्वती विद्यालय तामलवाडी या प्रशालेने राष्ट्रीय आर्थिक दुर्बल घटकांसाठी घेण्यात येणाऱ्या  (एनएमएमएस) परीक्षेत उल्लेखनीय यश संपादन केले आहे. इयत्ता आठवीतील तब्बल ९ विद्यार्थ्यांनी या परीक्षेत घवघवीत यश मिळवून विद्यालयाच्या शिरपेचात मानाचा तुरा खोवला आहे.

यामध्ये मगर मानसी मिलिंद (120 गुण), प्रगती नामदेव नरवडे (118 गुण), अक्षया ऋषिकेश जाधव (100 गुण), समृद्धी तुकाराम गायकवाड, प्राची प्रशांत गायकवाड, आर्या अनिल उन्हाळे, कृष्णात हिराचंद भोसले, सुयश रामदास रोहकले आणि वेदांत सचिन डांगे या विद्यार्थ्यांचा समावेश आहे. सर्व यशस्वी विद्यार्थ्यांचे सर्वत्र कौतुक होत आहे.

या यशाबद्दल विद्यालयात विशेष सत्कार समारंभाचे आयोजन करण्यात आले. प्रशालेचे प्राचार्य सुहास वडणे सर यांच्या हस्ते विद्यार्थ्यांना शाल व श्रीफळ देऊन गौरविण्यात आले. यावेळी त्यांनी विद्यार्थ्यांना पुढील वाटचालीसाठी मार्गदर्शन करत मेहनत, सातत्य आणि आत्मविश्वास यांचे महत्त्व अधोरेखित केले.

तसेच एनएमएमएस विभाग प्रमुख सावंत मॅडम यांचाही प्राचार्यांच्या हस्ते सत्कार करण्यात आला. याशिवाय सीताफळे सर, बत्तलवाड सर, चव्हाण सर यांच्यासह सर्व शिक्षकांचे अभिनंदन करण्यात आले. कार्यक्रमाचे प्रास्ताविक राऊत सर यांनी केले, तर आभार प्रदर्शन जाधव जी. एल. यांनी मांडले.

विद्यालयाच्या या यशामुळे तामलवाडी परिसरात आनंदाचे वातावरण असून सर्व स्तरांतून विद्यार्थ्यांवर अभिनंदनाचा वर्षाव होत आहे.