मुरूममध्ये भाजपच्या निवासी कार्यशाळेचा जल्लोषात शुभारंभ; बसवराज पाटील व दत्ता कुलकर्णींची प्रभावी उपस्थिती

"Only न्युज धाराशिव" वृत्तसेवा 

मुरूम | प्रतिनिधी

मुरूम येथील श्री. माधवराव पाटील महाविद्यालयात भारतीय जनता पक्षातर्फे आयोजित दोन दिवसीय ‘पंडित दीनदयाल उपाध्याय निवासी कार्यशाळा महाअभियान’ चे उत्साहपूर्ण वातावरणात उद्घाटन करण्यात आले. या कार्यक्रमाला भाजपचे ज्येष्ठ नेते तथा माजी मंत्री बसवराज पाटील आणि धाराशिव जिल्हाध्यक्ष दत्ता कुलकर्णी यांची प्रमुख उपस्थिती लाभली.

कार्यक्रमाची सुरुवात पंडित दीनदयाल उपाध्याय आणि डॉ. श्यामाप्रसाद मुखर्जी यांच्या प्रतिमेचे पूजन करून करण्यात आली. पक्ष संघटन अधिक भक्कम करण्यासाठी आणि कार्यकर्त्यांना वैचारिक बळ देण्यासाठी या निवासी कार्यशाळेचे आयोजन करण्यात आले आहे.

या महाअभियानामागील मुख्य उद्देश ‘अंत्योदय’ या विचारांचा प्रसार करणे हा असून, पंडित दीनदयाल उपाध्याय यांच्या एकात्म मानववादाच्या तत्त्वज्ञानाची माहिती तळागाळातील कार्यकर्त्यांपर्यंत पोहोचवण्यावर विशेष भर देण्यात येत आहे. बूथ स्तरापर्यंत संघटन सक्रिय करण्यासाठी तसेच नव्या कार्यकर्त्यांना पक्षाची कार्यपद्धती समजावून सांगण्यासाठी ही कार्यशाळा महत्त्वाची ठरत आहे.

कार्यशाळेत कार्यकर्त्यांना वक्तृत्व कौशल्य, जनसंपर्क आणि केंद्र व राज्य सरकारच्या विविध लोककल्याणकारी योजनांची माहिती प्रभावीपणे जनतेपर्यंत कशी पोहोचवावी, याबाबत मार्गदर्शन करण्यात येत आहे. विशेषतः पंतप्रधान नरेंद्र मोदी यांच्या नेतृत्वाखालील योजनांचा लाभ सर्वसामान्यांपर्यंत पोहोचवण्याचे आवाहन यावेळी करण्यात आले.

यावेळी धाराशिव जिल्हाध्यक्ष दत्ता कुलकर्णी यांनी जनसंघापासून ते आजच्या भारतीय जनता पक्षापर्यंतच्या प्रवासाचा आढावा घेत पक्षाच्या जडणघडणीवर सविस्तर भाष्य केले.

या उद्घाटन सोहळ्यास लातूर ग्रामीण जिल्हाध्यक्ष बसवराज पाटील, जिल्हा संयोजक दत्ता राजमाने, अ‍ॅड. अनिल काळे, नगर उपाध्यक्ष रमेश चव्हाण, मंडळ अध्यक्ष गणेश अंबर यांच्यासह अनेक पदाधिकारी, लोकप्रतिनिधी व कार्यकर्ते मोठ्या संख्येने उपस्थित होते.

दोन दिवस चालणाऱ्या या निवासी कार्यशाळेमुळे कार्यकर्त्यांमध्ये नवचैतन्य निर्माण झाले असून, आगामी काळात संघटन अधिक मजबूत होण्याची अपेक्षा व्यक्त केली जात आहे. कार्यक्रमाचे सूत्रसंचालन प्रा. उल्हास घुरघुरे यांनी केले.