वृक्षलागवडीने सजला गुरुजींच्या सेवानिवृत्तीचा आणि वाढदिवसाचा 'दुग्धशर्करा योग'! तुळजापुरात सतिश खोपडे सरांच्या कृतज्ञता सोहळ्यात पर्यावरण संवर्धनाचा संदेश; मान्यवरांची मोठी उपस्थिती

"Only न्युज धाराशिव" वृत्तसेवा 

तुळजापूर | उमाजी गायकवाड 

ज्ञानदानाच्या पवित्र कार्यातून निवृत्त होताना समाजाचे ऋण फेडण्याच्या उद्देशाने, तुळजापूर येथील पुजारी नगरमध्ये एक आगळावेगळा कृतज्ञता सोहळा पार पडला. मसला येथील छत्रपती शाहू महाराज माध्यमिक विद्यालयाचे कर्तव्यदक्ष सहशिक्षक, पुजारी नगरचे सन्माननीय सदस्य तथा पुजारी नगर बचत गटाचे सचिव सतिश रामचंद्र खोपडे हे दि. ३० जून रोजी नियतवयोमानानुसार  सेवानिवृत्त झाले. विशेष म्हणजे, सेवानिवृत्तीच्या दुसऱ्याच दिवशी, म्हणजेच बुधवार दि. १ जुलै रोजी खोपडे सरांचा वाढदिवस होता. या दुग्धशर्करा योगाचे औचित्य  पुजारी नगरमध्ये बुधवारी सायंकाळी वृक्षलागवडीचा एक अत्यंत स्तुत्य आणि पर्यावरणपूरक उपक्रम राबवण्यात आला. पुजारी नगर मधील सर्व सदस्यांच्या वतीने त्यांच्या वाढदिवसानिमित्त शाल श्रीफळ,व पुष्पहार घालून सत्कार करण्यात आला.

‘झाडे लावा, झाडे जगवा’चा दिला संदेश

वाढत्या जागतिक तापमानाच्या पार्श्वभूमीवर केवळ वृक्षलागवड न करता त्यांचे संवर्धन करणे ही काळाची गरज बनली आहे. नेमका हाच विचार समोर ठेवून खोपडे सरांच्या वाढदिवसानिमित्त पुजारी नगर परिसरात आंबा, फणस, आवळा, सीताफळ, जांभूळ यांसारख्या विविध प्रकारच्या फळझाडांची व सावली देणाऱ्या वृक्षांची लागवड करण्यात आली. यावेळी उपस्थित नागरिकांनी केवळ झाडे लावण्याचा संकल्प न करता, लावलेली झाडे दत्तक घेऊन ती जगवण्याची प्रतिज्ञा केली.

विद्यार्थी घडवण्यासोबतच समाजसेवेचा वसा

सतिश खोपडे सरांनी आपल्या प्रदीर्घ सेवाकाळात केवळ पुस्तकी ज्ञान न देता विद्यार्थ्यांना सुसंस्कृत नागरिक बनवले. शिक्षकी पेशा सांभाळत असतानाच त्यांनी पुजारी नगर बचत गटाचे सचिव म्हणून सामाजिक बांधिलकी देखील जपली. त्यांच्या या निरपेक्ष आणि प्रामाणिक कार्याचा गौरव करण्यासाठी परिसरातील नागरिकांनी आणि विविध क्षेत्रांतील मान्यवरांनी या सोहळ्याला उपस्थित राहून त्यांच्या पुढील भावी आयुष्यासाठी शुभेच्छा दिल्या.

या पर्यावरणपूरक उपक्रमाप्रसंगी पुजारी नगर फाउंडेशनचे अध्यक्ष गणेश पुजारी, कार्याध्यक्ष श्रावण मामा पवार, समाजवादी पक्षाचे तालुकाध्यक्ष राहुल जाधव, सिद्धेश्वर इंगोले, वैभव ताटे, शिवशंकर म्हमाणे, ग्रामविकास अधिकारी शिवाजी चव्हाण,रुतेश कवडे, सोमनाथ पुजारी, अनिल आगलावे, उमाजी गायकवाड, आबा पुजारी, बाबुराव पुजारी, प्रतिक कांबळे, मल्लेश विभूते, लोंढे सर, अजित गोरे, जगदाळे, नाईक सर, देवकते सरांसह पुजारी नगर मधील इतर सन्माननीय सदस्य आणि ग्रामस्थ मोठ्या संख्येने उपस्थित होते. सोहळ्याची सांगता उपस्थित सर्वांचे आभार मानून आणि पर्यावरण रक्षणाची शपथ घेऊन झाली.

उपस्थित मान्यवरांचे गौरवोद्गार 

"शिक्षक कधीच निवृत्त होत नसतो, तो केवळ शाळेच्या चौकटीतून बाहेर पडून समाजाचा मार्गदर्शक बनतो. सतिश खोपडे सरांनी निवृत्तीच्या आणि वाढदिवसाच्या क्षणी वृक्षलागवड करून समाजाला नवी दिशा दाखवली आहे. त्यांनी लावलेली ही रोपे भविष्यात वटवृक्ष बनून येणाऱ्या पिढ्यांना सावली आणि फळे देतील, यात शंका नाही. सरांना निरोगी आणि दीर्घायुषी निवृत्त जीवनाच्या हार्दिक शुभेच्छा!"

— गणेश पुजारी (अध्यक्ष, पुजारी नगर फाउंडेशन)

"खोपडे सरांनी नोकरीच्या काळात हजारो विद्यार्थी घडवले आणि निवृत्त होताना निसर्गाची समृद्धी वाढवण्याचे पाऊल उचलले. शिक्षकी पेशासोबतच त्यांनी जो समाजसेवेचा वसा जपला, तो आम्हा सर्वांसाठी प्रेरणादायी आहे. सतिश खोपडे सरांचे आभार मानताना आनंद होतोय की त्यांनी पुजारी नगरला नेहमीच आपले मानले. त्यांचे पुढील आयुष्य सुखाचे आणि समृद्धीचे जावो, हीच ईश्वरचरणी प्रार्थना!"

— श्रावण मामा पवार (कार्याध्यक्ष, पुजारी नगर फाउंडेशन)

"सेवामुक्त नक्कीच झाला आहात, पण कर्तव्यातून नाही;

ज्ञानदानाचा सुगंध दरवळत राहील, तुमच्या पावलां पाठी!"

— पुजारी नगर परिवार व कृतज्ञता पूर्वक आभार