तुळजापुरात सुरक्षारक्षकाचा प्रामाणिकपणा! आंध्र प्रदेशातील महिला भाविकाचे हरवलेले पाकीट सुखरूप परत; रोख रकमेसह महत्त्वाचे दस्तऐवज सुपूर्द
"Only न्युज धाराशिव" वृत्तसेवा
तुळजापूर | उमाजी गायकवाड
कुलस्वामिनी श्री तुळजाभवानी देवीच्या दर्शन नगरीत सुरक्षा रक्षकाच्या तत्परतेमुळे आणि प्रामाणिकपणामुळे एका परप्रांतीय महिला भाविकाला तिचे हरवलेले पाकीट सुखरूप परत मिळाले आहे. या पाकीटात ८,८१२ रुपयांची रोख रक्कम, पेन ड्राईव्ह आणि अत्यंत महत्त्वाची कागदपत्रे होती. सुरक्षारक्षकाने दाखवलेल्या या प्रामाणिकपणाचे मंदिर संस्थान आणि भाविकांकडून जोरदार कौतुक होत आहे.
नेमकी काय आहे घटना?
मिळालेल्या माहितीनुसार, रविवारी (दि. २६ जुलै २०२६) श्री तुळजाभवानी मंदिर परिसरात सुरक्षा सेवा पुरवणाऱ्या SISPL कंपनीचे सुरक्षा निरीक्षक श्री. योगेश फडके हे कर्तव्यावर असताना त्यांना मंदिर परिसरात एक बेवारस पाकीट (वॉलेट) सापडले. त्यांनी कोणताही मोह न बाळगता तात्काळ ते पाकीट श्री तुळजाभवानी मंदिर संस्थानच्या मुख्य कंट्रोल रूममध्ये जमा केले.
कंट्रोल रूममध्ये पडताळणी आणि सुपूर्दी:
कंट्रोल रूममध्ये अधिकाऱ्यांच्या उपस्थितीत सदर पाकीटाची पाहणी व पडताळणी करण्यात आली. त्यामध्ये ८,८१२ रुपयांची रोख रक्कम, एक पेन ड्राईव्ह आणि महत्त्वाचे वैयक्तिक दस्तऐवज आढळून आले. कागदपत्रांच्या आधारे आणि खात्रीशीर पडताळणी केल्यानंतर, हे पाकीट आंध्र प्रदेश येथून दर्शनासाठी आलेल्या दुर्गाराणी नावाच्या महिला भाविकाचे असल्याचे स्पष्ट झाले.
त्यानंतर मंदिर संस्थानच्या अधिकाऱ्यांनी व सुरक्षा पथकाने संबंधित महिला भाविकाशी संपर्क साधून, योग्य ती शहानिशा केल्यानंतर ते पाकीट रोख रकमेसह सुरक्षितपणे त्यांच्या स्वाधीन केले.
महिला भाविकाकडून कृतज्ञता व्यक्त:
ऐन गर्दीच्या ठिकाणी हरवलेले पाकीट आणि त्यातील सर्व वस्तू, रोख रक्कम सुरक्षितपणे परत मिळाल्याने भाविक दुर्गाराणी यांनी अत्यंत आनंदी होत सुरक्षा निरीक्षक योगेश फडके, SISPL सुरक्षा विभाग आणि श्री तुळजाभवानी मंदिर संस्थानच्या प्रशासनाचे मनःपूर्वक आभार मानले. तुळजापूर देवस्थानच्या सुरक्षा यंत्रणेने दाखवलेल्या या तत्परतेमुळे तुळजाभवानी मंदिराच्या सुरक्षेचा आणि प्रामाणिकपणाचा पुन्हा एकदा प्रत्यय आला आहे.
0 Comments