'Only न्यूज धाराशिव' वृत्तसेवा
तुळजापूर | उमाजी गायकवाड
तुळजापूर: फेब्रुवारी २०२६ मध्ये पार पडलेल्या प्रतिष्ठित 'मंथन राज्यस्तरीय सामान्य ज्ञान स्पर्धा परीक्षेत' सुयश मिळवणाऱ्या तुळजापूर तालुक्यातील १६४ गुणवंत विद्यार्थ्यांचा नुकताच तुळजापूर पंचायत समिती येथे नयनरम्य सोहळ्यात सन्मान करण्यात आला.
कार्यक्रमाच्या अध्यक्षस्थानी तुळजापूर पंचायत समितीचे सभापती मा. श्री. विक्रमसिंह (मालक) फत्तेसिंह देशमुख हे होते. छत्रपती शिवाजी महाराज व ज्ञानदेवतांच्या प्रतिमेचे पूजन आणि दीपप्रज्वलनाने सोहळ्याची अतिशय उत्साहात सुरुवात झाली.
१० केंद्रांमधून तब्बल १८६० विद्यार्थ्यांचा सहभाग
मंथन परीक्षेच्या तुळजापूर संचालिका सौ. मोहिनी क्षीरसागर मॅडम यांनी दिलेल्या माहितीनुसार, तालुक्यातील १० केंद्रांमधून मराठी, सेमी-इंग्रजी आणि इंग्रजी माध्यमातून तब्बल १,८६० विद्यार्थ्यांनी ही परीक्षा दिली होती. त्यापैकी विशेष प्राविण्य मिळवणाऱ्या १६४ विद्यार्थ्यांना मान्यवरांच्या हस्ते चमकदार सन्मानचिन्ह देऊन सन्मानित करण्यात आले.
"ग्रामीण व शहरी भागातील विद्यार्थ्यांमध्ये स्पर्धात्मक बुद्धिमत्ता वाढवण्यासाठी मंथनसारख्या परीक्षा अत्यंत महत्त्वाच्या आहेत."
— श्री. विक्रमसिंह (मालक) देशमुख, सभापती
मान्यवरांची प्रमुख उपस्थिती
या दिमाखदार सोहळ्यास उपसभापती सौ. रोहिणी मेलगिरी, धाराशिव जिल्हा परिषद सदस्य मा. श्री. महेंद्रकाका धुरगुडे, मा. श्री. बाळासाहेब भाले, पंचायत समितीचे सहाय्यक प्रशासन अधिकारी मा. श्री. ऋषिकेश पिंपळे, हॉर्टी केंद्राचे केंद्रप्रमुख श्री. शांताराम कुंभार सर, अणदूर केंद्राच्या केंद्रप्रमुख श्रीम. सीमा दुधगी मॅडम आणि धाराशिव शिक्षक सहकारी पतसंस्थेचे संचालक श्री. बाळासाहेब घेवारे सर यांची प्रमुख उपस्थिती लाभली होती.
नियोजनबद्ध सोहळा
प्रास्ताविक: श्री. बाळासाहेब घेवारे सर यांनी प्रास्ताविकातून मंथन परीक्षेचे स्वरूप व उद्देश स्पष्ट केला.
सूत्रसंचालन: श्री. केशव काळे सर यांनी आपल्या ओघवत्या शैलीत सूत्रसंचालन केले.
आभार प्रदर्शन: श्री. तुकाराम वाडकर सर यांनी सर्व उपस्थितांचे आभार मानले.
हा सोहळा यशस्वी करण्यासाठी श्री. अजित माळी, सुसेन सुरवसे, श्री. बाळासाहेब चिवडे, विनोद स्वामी, नागेश भोसले, पांडुरंग देशमुख, ज्योतिर्लिंग क्षीरसागर, श्रीमती कानडे मॅडम व श्रीमती काळे मॅडम यांच्यासह सहकाऱ्यांनी परिश्रम घेतले. या प्रसंगी गुणवंत विद्यार्थी, त्यांचे पालक आणि शिक्षक मोठ्या संख्येने उपस्थित होते.
0 Comments