🚩 कावळेवाडीच्या दोन लेकींची अभिमानास्पद झेप!उपमहापौर ते सीमा सुरक्षा दल — बैलगाडीतून काढली जंगी मिरवणूक, गावाचा गौरवसोहळा उत्साहात संपन्न 🚩

ढोकी | सुरेश कदम

धाराशिव तालुक्यातील कावळेवाडी या छोट्याशा गावाने आपल्या दोन लेकींच्या कर्तृत्वाचा अभिमान मिरवला. एकीने सोलापूरच्या उपमहापौरपदी मानाचे स्थान मिळवले, तर दुसरीने सीमा सुरक्षा दलात (BSF) नियुक्ती मिळवत देशसेवेचा मान पटकावला. या दोन्ही कन्यांचा ग्रामस्थांच्या वतीने मंगळवार, दि. २४ रोजी सायंकाळी ७ वाजता बैलगाडीतून भव्य मिरवणूक काढत जंगी सत्कार करण्यात आला.

कावळेवाडीची लेक ज्ञानेश्वरी देवकर यांची नुकतीच सोलापूरच्या उपमहापौरपदी निवड झाली. त्या दक्षिण-पश्चिम सोलापूर भाजप अध्यक्ष महेश देवकर यांच्या पत्नी असून शेतकरी कुटुंबातून पुढे आलेल्या आहेत. त्यांच्या या यशामुळे गावात आनंदाचे वातावरण निर्माण झाले आहे.

तसेच शेतकरी कुटुंबातीलच कन्या प्राजक्ता क्षीरसागर हिने अथक परिश्रम व जिद्दीच्या जोरावर Border Security Force (सीमा सुरक्षा दल) मध्ये नियुक्ती मिळवली. कावळेवाडी गावातून सीमेवर लढणारी ती पहिली महिला ठरली असून तिच्या या यशामुळे गावाचे नाव उज्ज्वल झाले आहे.

🎉 बैलगाडीतून भव्य मिरवणूक

दोन्ही लेकींसह त्यांच्या आई-वडिलांची टाळ-मृदंगाच्या गजरात, फटाक्यांच्या आतषबाजीत आणि बाल वारकऱ्यांच्या उपस्थितीत बैलगाडीतून मिरवणूक काढण्यात आली. कार्यक्रमाच्या प्रारंभी ग्रामदैवत श्री मारुती मंदिरात श्रीफळ फोडून शुभारंभ करण्यात आला.

यावेळी स्वर्गीय बालाजी घोगरे यांना श्रद्धांजली अर्पण करण्यात आली. पोलीस उपनिरीक्षक किशोर माळी हे प्रमुख पाहुणे म्हणून उपस्थित होते. जिजाऊ वंदनेने कार्यक्रमाची सुरुवात झाली.

👏 महिला बचत गटांचा विशेष सन्मान

गावातील १९ महिला बचत गटांच्या अध्यक्ष व सचिवांनी दोन्ही कन्यांच्या पालकांचा सत्कार केला. तसेच समस्त सोलापूर ग्रुप व देवकर परिवाराचाही सन्मान सरपंच अॅड. अजित खोत, उपसरपंच अर्चना गुणवंत कावळे व इतर मान्यवरांच्या हस्ते शाल, श्रीफळ व पुष्पगुच्छ देऊन करण्यात आला.

💬 मनोगत व आभार

उपमहापौर ज्ञानेश्वरी देवकर यांनी गावकऱ्यांचे आभार मानत आपल्या यशाचे श्रेय कुटुंब व ग्रामस्थांना दिले. रामलिंग कावळे यांनी मनोगत व्यक्त केले. कार्यक्रमाचे सूत्रसंचालन आकाश कावळे यांनी केले, तर समारोप अॅड. अजित खोत यांच्या भाषणाने झाला.

हा भव्य सत्कार सोहळा यशस्वी करण्यासाठी गावातील तरुणांनी विशेष परिश्रम घेतले. संपूर्ण कावळेवाडी गाव अभिमानाने आणि उत्साहाने न्हाऊन निघाले होते.