धाराशिवच्या शिरपेचात मानाचा तुरा! काटीचा सुपुत्र जयदीप देशमुख याचा पुण्यातील दीक्षांत समारंभात गौरव

"Only न्युज धाराशिव" वृत्तसेवा

काटी | उमाजी गायकवाड

जिद्द, चिकाटी आणि कष्टाच्या जोरावर धाराशिव जिल्ह्याने नेहमीच विविध क्षेत्रात आपली मोहोर उमटवली आहे. याचाच प्रत्यय पुन्हा एकदा आला असून, तुळजापूर तालुक्यातील काटी येथील सुपुत्र जयदीप जयाजी देशमुख यांनी पुण्यात आयोजित करण्यात आलेल्या विशेष दीक्षांत समारंभात सन्मान प्राप्त करून जिल्ह्याच्या शिरपेचात मानाचा तुरा रोवला आहे.

नेमका कार्यक्रम काय होता?

'इन्स्टिट्यूट ऑफ कॉस्ट अकाउंटंट्स ऑफ इंडिया' (ICMAI) पुणे चॅप्टर, कर्वे नगर यांच्या वतीने डिसेंबर २०२५ मध्ये पात्र (Qualified) ठरलेल्या सी.एम.ए. (CMA) सदस्यांसाठी विशेष 'ॲडव्हान्स्ड स्किल ट्रेनिंग प्रोग्राम' (ASTP) आयोजित करण्यात आला होता. ११ दिवसांचा हा सखोल प्रशिक्षण कार्यक्रम २० मार्च ते ३० मार्च २०२६ या कालावधीत यशस्वीरित्या पार पडला.

कौशल्यावर आधारित सखोल प्रशिक्षण

या ११ दिवसांच्या प्रशिक्षणात नव्या सी.एम.ए. सदस्यांना कॉर्पोरेट जगातील आव्हाने, प्रगत लेखापरीक्षण तंत्रे, जीएसटी आणि प्रत्यक्ष करांमधील बदल, तसेच व्यवस्थापकीय कौशल्यांचे धडे देण्यात आले. या प्रशिक्षणाचा मुख्य उद्देश ग्रामीण भागातील गुणवंत विद्यार्थ्यांना जागतिक स्तरावरील स्पर्धेसाठी सज्ज करणे हा होता.

दिमाखदार दीक्षांत समारंभ आणि सन्मान

प्रशिक्षण कार्यक्रमाचा समारोप रविवारी (३० मार्च) एका भव्य दीक्षांत समारंभाने करण्यात आला. यावेळी व्यासपीठावर सी.एम.ए. क्षेत्रातील ICMAI पुणे चॅप्टरचे चेअरमन सी.एम.ए. श्रीकांत इप्पलपल्ली माजी आयसीएमएआयचे अध्यक्ष सीएमए धनंजय जोशी,माजी आयसीएमएआयचे अध्यक्ष सीएमए अमित आपटे, आयसीएमएआयचे पुणे चॅप्टरचे उपाध्यक्ष सीएमए राहुल चिंचोलकर सीएमए निलेश केकन, सीएमए हिमांशु दवे आदी दिग्गज मान्यवर आणि उद्योजक उपस्थित होते.

याप्रसंगी तुळजापूरच्या मातीतील सुपुत्र जयदीप जयाजी देशमुख यांना उपस्थित मान्यवरांच्या हस्ते प्रमाणपत्र देऊन गौरविण्यात आले. त्यांच्या या यशामुळे काटी परिसरात आणि संपूर्ण धाराशिव जिल्ह्यात आनंदाचे वातावरण पसरले आहे.

ग्रामीण गुणवत्तेचा सन्मान

एकीकडे सी.एम.ए. सारखी परीक्षा उत्तीर्ण होणे ही मोठी उपलब्धी मानली जाते, तर दुसरीकडे अशा व्यावसायिक प्रशिक्षणात स्वतःची वेगळी ओळख निर्माण करणे हे कौतुकास्पद आहे. जयदीप देशमुख यांनी मिळवलेले हे यश आगामी काळात धाराशिव जिल्ह्यातील वाणिज्य शाखेच्या विद्यार्थ्यांसाठी प्रेरणादायी ठरणार आहे.