महाराष्ट्र लोकसेवा आयोगाच्या परीक्षेत आरळी बुद्रुकच्या सुमित पारवेचे दैदीप्यमान यश; राज्यात द्वितीय!

"Only न्युज धाराशिव" वृत्तसेवा 

काटी | उमाजी गायकवाड 

जिद्द, चिकाटी आणि सातत्यपूर्ण अभ्यासाच्या जोरावर तुळजापूर तालुक्यातील आरळी बुद्रुकच्या शिरपेचात मानाचा तुरा रोवला गेला आहे. गावातील सुपुत्र सुमित सुनील पारवे याने महाराष्ट्र लोकसेवा आयोगामार्फत (MPSC) घेण्यात आलेल्या 'ग्रुप-सी' सेवा मुख्य परीक्षेत लिपिक-टंकलेखक (Clerk-Typist) पदावर घवघवीत यश संपादन केले आहे. विशेष म्हणजे, सुमितने संपूर्ण राज्यातून (SEBC प्रवर्ग) दुसरा क्रमांक पटकावून आपल्या गावचा आणि जिल्ह्याचा नावलौकिक वाढवला आहे.

लोकायुक्त कार्यालयात होणार नियुक्ती

महाराष्ट्र लोकसेवा आयोगाने २०२४ च्या ग्रुप-सी मुख्य परीक्षेची यशस्वी उमेदवारांची यादी जाहीर केली आहे. यामध्ये 'लोकायुक्त आणि उप-लोकायुक्त कार्यालय, महाराष्ट्र राज्य, मुंबई' या महत्त्वाच्या विभागासाठी सुमितची निवड झाली आहे. त्याने २८१.५० गुण मिळवत राज्यस्तरीय गुणवत्ता यादीत आपले स्थान निश्चित केले. सुमित हा आरळी बुद्रुक येथील माजी सरपंच सौ. ज्योती सुनील पारवे आणि आरळी बुद्रुक महोत्सव समितीचे अध्यक्ष सुनील (बप्पा) पारवे यांचा ज्येष्ठ सुपुत्र आहे.

संघर्षातून यशाचे शिखर

सुमितने मिळवलेले हे यश ग्रामीण भागातील तरुणांसाठी प्रेरणादायी ठरणार आहे. अत्यंत चुरशीच्या असलेल्या या परीक्षेत त्याने SEBC सर्वसाधारण गटातून राज्यातून दुसरा येण्याचा बहुमान मिळवला. त्याच्या या यशाची बातमी समजताच आरळी बुद्रुकसह संपूर्ण तुळजापूर तालुक्यात आनंदाचे वातावरण पसरले असून, सर्व स्तरांतून त्याच्यावर अभिनंदनाचा वर्षाव होत आहे.

काय म्हणतात मान्यवर?

"मुलाने मिळवलेले हे यश त्याच्या कष्टाचे आणि जिद्दीचे फळ आहे. त्याने केवळ आमचेच नव्हे, तर संपूर्ण गावाचे नाव राज्यस्तरावर चमकवले आहे. त्याने प्रशासकीय सेवेत जाताना सर्वसामान्यांचे प्रश्न सोडवण्यासाठी नेहमी तत्पर राहावे, हीच आमची सदिच्छा आहे."

— सुनील (बप्पा) पारवे

(अध्यक्ष: आरळी बुद्रुक महोत्सव समिती तथा सुमितचे वडील)

"आरळी बुद्रुक महोत्सव समितीच्या वतीने आम्ही नेहमीच सामाजिक आणि सांस्कृतिक उपक्रम राबवतो, पण आज सुमितने मिळवलेले शैक्षणिक यश हे आमच्यासाठी सर्वात मोठा 'महोत्सव' आहे. ग्रामीण भागातील मुलेही राज्यात अव्वल येऊ शकतात, हे त्याने सिद्ध केले आहे. सुमितचे हे यश आम्हा सर्व मित्रांसाठी अभिमानास्पद आहे."

— आरळी बुद्रुक महोत्सव समिती मित्र परिवार

"सुमित हा अभ्यासात सुरुवातीपासूनच हुशार आणि संयमी होता. स्पर्धा परीक्षेच्या कठीण प्रवासात त्याने कधीही हार मानली नाही. लोकायुक्त कार्यालयासारख्या महत्त्वाच्या ठिकाणी त्याची निवड होणे, ही आमच्या आरळी बुद्रुक ग्रामस्थांसाठी गौरवाची बाब आहे."

— धैर्यशील नारायणकर

(ग्रामस्थ, आरळी बुद्रुक)