'Only न्यूज धाराशिव' वृत्तसेवा
तुळजापूर | उमाजी गायकवाड
श्री तुळजाभवानी मंदिर आणि परिसर स्वच्छ, सुंदर व पवित्र राखण्याच्या हेतूने मंदिर संस्थानने सुरू केलेल्या विशेष स्वच्छता मोहिमेला आता वेग आला आहे. मंदिर प्रशासनाने स्थापन केलेल्या विशेष पथकांनी आज धडक कारवाई करत, मंदिर परिसरात नियमांचे उल्लंघन करून थुंकणाऱ्या १० जणांवर दंडात्मक कारवाई केली आहे. संबंधित व्यक्तींकडून प्रत्येकी ५०० रुपये याप्रमाणे एकूण ५ हजार रुपयांचा दंड वसूल करण्यात आला आहे.
काही दिवसांपूर्वीच मंदिर संस्थानने अस्वच्छता करणाऱ्यांविरोधात कठोर पावले उचलण्याचे संकेत दिले होते. त्या पार्श्वभूमीवर झालेली ही कारवाई इतर बेजबाबदार व्यक्तींसाठी एक मोठा इशारा मानली जात आहे.
विशेष पथकांकडून चोख गस्त
मंदिर परिसरात कुठेही थुंकणे, अस्वच्छता करणे किंवा कचरा टाकणे यासारख्या अनिष्ट प्रकारांना आळा घालण्यासाठी मंदिर संस्थानच्या सहायक स्वच्छता निरीक्षकांच्या नेतृत्वाखाली दोन विशेष पथके तैनात करण्यात आली आहेत. ही पथके दररोज दोन वेगवेगळ्या शिफ्टमध्ये मंदिर परिसरात सातत्याने गस्त घालत आहेत. आज गस्त घालत असतानाच, प्रत्यक्ष जागेवर (On the spot) नियमांचे उल्लंघन करताना आढळलेल्या १० जणांना या पथकाने पकडले आणि त्यांच्यावर कायदेशीर दंडात्मक कारवाईची प्रक्रिया पूर्ण केली.
प्रशासनाचा 'कठोर' पवित्रा
तुळजापूर हे महाराष्ट्रातील प्रमुख साडेतीन शक्तीपीठांपैकी एक असून, येथे दर्शनासाठी दररोज हजारो भाविकांची मांदियाळी असते. अनेकदा भाविक आणि स्थानिक नागरिकांकडून प्रशासनाच्या आवाहनाकडे दुर्लक्ष केले जाते. हे लक्षात घेऊनच मंदिर संस्थानने आता केवळ विनंती न करता थेट दंडात्मक कारवाईची कठोर भूमिका घेतली आहे. या मोहिमेमुळे मंदिर परिसरातील स्वच्छतेचा दर्जा सुधारण्यास मदत होईल, असा विश्वास प्रशासनाने व्यक्त केला आहे.
भाविकांना शिस्तीचे आवाहन
"तुळजाभवानी मातेच्या दर्शनासाठी येणाऱ्या प्रत्येक भाविकाने मंदिराचे पावित्र्य राखणे गरजेचे आहे. भाविकांनी परिसरात कुठेही न थुंकता तसेच कचरा इतरत्र न टाकता केवळ कचरापेटीचाच (Dustbin) वापर करावा आणि प्रशासनाला सहकार्य करावे," असे आवाहन श्री तुळजाभवानी मंदिर संस्थानच्या वतीने करण्यात आले आहे. यापुढेही ही मोहीम अशीच तीव्रतेने सुरू राहणार असल्याचे संकेत प्रशासकीय सूत्रांनी दिले आहेत.
0 Comments