'Only न्युज धाराशिव' वृत्तसेवा
काटी | उमाजी गायकवाड
अचानक आलेल्या हृदयविकाराच्या झटक्यामुळे (Cardiac Arrest) मृत्युच्या दारात उभ्या असलेल्या रुग्णावर तातडीने 'सीपीआर' (CPR) उपचार करून प्राण वाचवणारे डॉ. आसिफ मुजावर यांच्या तत्परतेची दखल घेत बनसोडे कुटुंबीयांच्या वतीने त्यांचा फेटा, टोपी, शाल व श्रीफळ देऊन जाहीर सत्कार करण्यात आला. काटी (ता. तुळजापूर) येथील डॉ. युसूफ नाज हॉस्पिटलमध्ये घडलेल्या या घटनेत वैद्यकीय क्षेत्रातील प्रसंगावधान आणि माणुसकीचे दर्शन घडले आहे.
मिळालेल्या माहितीनुसार, १ सप्टेंबर रोजी सायंकाळी ८.३० वाजण्याच्या सुमारास काटी येथील दिलीप येडाप्पा बनसोडे हे अंगाला खाज येत असल्याने येथील डॉ. युसूफ नाज हॉस्पिटलमध्ये उपचारासाठी गेले होते. तपासणीदरम्यान रक्तदाब (BP) तपासत असतानाच त्यांना अचानक चक्कर आली आणि ते खाली कोसळून बेशुद्ध पडले. रुग्णामध्ये हृदयविकाराच्या झटक्याची गंभीर लक्षणे दिसताच, डॉ. आसिफ मुजावर यांनी क्षणाचाही विलंब न लावता तातडीने सीपीआर (Cardiopulmonary Resuscitation) देऊन प्रथमोपचार सुरू केले.
योग्य वेळी मिळालेल्या या सीपीआरमुळे रुग्णाची प्रकृती स्थिर झाली. त्यानंतर पुढील हृदयरोग तपासणी व अत्याधुनिक उपचारांसाठी रुग्णाला कार्डियाक अॅम्ब्युलन्सने (ACS Facility) उच्चस्तरीय रुग्णालयात पाठवण्यात आले. तेथील हृदयरोग तज्ज्ञ डॉ. प्रमोद पवार यांनी रुग्णाची तपासणी करून सांगितले की, "डॉ. मुजावर यांनी सुरुवातीच्या 'गोल्डन अवर'मध्ये दिलेला प्रभावी सीपीआर अत्यंत महत्त्वाचा ठरला. त्यामुळेच रुग्णाचे प्राण वाचले असून सर्व वैद्यकीय अहवाल सामान्य (नॉर्मल) आले आहेत." दोन दिवसांच्या उपचारानंतर दिलीप बनसोडे यांना रुग्णालयातून सुखरूप डिस्चार्ज देण्यात आला.
'देवदूता'चा बनसोडे परिवाराकडून कृतज्ञता सोहळा
दिलीप बनसोडे यांना सुखरूप डिस्चार्ज मिळाल्यानंतर, बनसोडे परिवाराने डॉ. आसिफ मुजावर यांच्या दवाखान्यात जाऊन त्यांचा फेटा, टोपी, शाल, श्रीफळ, पुष्पहार आणि पुस्तक भेट देऊन कृतज्ञता सोहळा पार पाडला. "डॉक्टर साहेब, तुमच्या तत्परतेमुळेच आमच्या कुटुंबातील सदस्याला पुनर्जन्म मिळाला," अशा भावना व्यक्त करत बनसोडे कुटुंबीयांनी डॉक्टरांचे आभार मानले.
या कृतज्ञता सोहळ्याला डॉ. समरीन आसिफ मुजावर, माजी उपसरपंच अशोक (आण्णा) बनसोडे, दलित मित्र व पत्रकार नंदू बनसोडे, बाळू बनसोडे, दिलीप बनसोडे, विजय बनसोडे, शेषाप्पा बनसोडे, भोलेनाथ बनसोडे, प्रताप बनसोडे, राहुल बनसोडे, जनार्दन बनसोडे, नारायण आगलावे, दिनेश क्षीरसागर, अनुसया बनसोडे, राजाबाई बनसोडे यांच्यासह गावातील नागरिक उपस्थित होते.
वैद्यकीय क्षेत्रातील सामाजिक बांधीलकी
काटी व परिसरात कै. डॉ. युसूफ मुजावर यांनी रुजवलेला रुग्णसेवेचा वारसा त्यांची मुले समर्थपणे पुढे चालवत आहेत. डॉ. आसिफ मुजावर हे वैद्यकीय पेशाला व्यवसाय न मानता सामाजिक कर्तव्य मानतात.
अल्पदरात उपचार: अत्यंत नाममात्र शुल्कात उपचार करणे आणि गरीब रुग्णांना "बरे झाल्यावर पैसे द्या" असा दिलासा देणे.
आपुलकीचा संवाद: गावातील रुग्ण सोलापूर किंवा इतर शहरांत पुढील उपचारासाठी दाखल असल्यास, स्वतः जाऊन त्यांची भेट घेणे आणि नातेवाईकांना मानसिक आधार देणे.
'गोल्डन अवर' आणि 'CPR' चे महत्त्व
कार्डियाक अरेस्ट आल्यानंतर सुरुवातीचे काही मिनिटे (गोल्डन अवर) रुग्णासाठी अत्यंत मोलाचे असतात.
रक्तपुरवठा सुरळीत ठेवणे: सीपीआरमुळे मेंदू आणि इतर महत्त्वाच्या अवयवांना ऑक्सिजनयुक्त रक्ताचा पुरवठा सुरू राहतो.
जनजागृतीची गरज: आपत्कालीन प्रसंगी प्रत्येक नागरिकाला प्राथमिक सीपीआर कसा द्यावा, याचे ज्ञान असणे जीव वाचवण्यासाठी गरजेचे ठरते, असे मत वैद्यकीय विश्वातून व्यक्त होत आहे.
उपस्थितांच्या प्रतिक्रिया:
"काटीसारख्या ग्रामीण भागात डॉ. आसिफ मुजावर यांच्यासारखे तत्पर डॉक्टर असणे हे परिसरासाठी वरदान आहे. डॉक्टरांनी दाखवलेल्या प्रसंगावधानामुळे आणि वेळेवर दिलेल्या सीपीआरमुळे आज आमच्या कुटुंबातील सदस्याला जीवदान मिळाले आहे."
— नंदू बनसोडे (पत्रकार तथा दलित मित्र, काटी)
"डॉ. आसिफ मुजावर यांनी केवळ उपचार केले नाहीत तर आमच्या कुटुंबाला मोठा आधार दिला. मुजावर कुटुंबीयांचा हा सेवाभावी दृष्टिकोन आणि माणुसकीचा धर्म सर्वांसाठीच आदर्शवत आहे."
— अशोक बनसोडे (माजी उपसरपंच, काटी)
"वेळेवर मिळालेले उपचार म्हणजेच जीवदान. डॉ. आसिफ मुजावर सरांनी आम्हाला वेळेवर मदत करून आमच्या चुलत्यांना पुनर्जन्म दिला. बनसोडे परिवार त्यांचा सदैव ऋणी राहील.
--भोलेनाथ बनसोडे,काटी
0 Comments