हुरडा पार्ट्यांच्या जाहिरातबाजीत 'बिराजदार वस्ती'वर जपली गावरान माणुसकी!​ उमरग्यात रंगला पारंपरिक हुरड्याचा गोडवा; नव्या पिढीला घडले शेती संस्कृतीचे दर्शन!

​मुरूम/प्रतिनिधी

आजच्या व्यावसायिक युगात हुरडा पार्ट्यांचे स्वरूप बदलले असताना, ग्रामीण भागात मात्र आजही पारंपरिक माणुसकीचा ओलावा कायम असल्याचे पाहायला मिळत आहे. उमरगा तालुक्यातील बिराजदार वस्ती येथील प्रगतशील शेतकरी कलाप्पा पाटील यांनी आपल्या शेतात आयोजित केलेल्या हुरडा पार्टीने या संस्कृतीचे दर्शन घडवून दिले.

​शहरातील नव्या पिढीला शेतीची ओळख व्हावी, ग्रामीण परंपरा जपल्या जाव्यात आणि सामाजिक सलोखा वाढावा, या उदात्त हेतूने या खास मेजवानीचे आयोजन करण्यात आले होते. गुरुवारी (दि. 19) पार पडलेल्या या सोहळ्यात रोटरी क्लब आणि शिक्षण क्षेत्रातील मान्यवरांनी हजेरी लावली होती.

अशी रंगली मेजवानी:

शेतातील चुलीवर भाजलेली ज्वारीची कोवळी कणसे, सोबत लसूण-शेंगदाण्याची चटणी, गूळ, चिवडा, खारमुरे आणि पेंडखजूर अशा अस्सल गावरान पदार्थांची मेजवानी यावेळी देण्यात आली. केवळ जेवणच नव्हे, तर लोकगीतांचे सादरीकरण, पारंपरिक खेळ आणि मनोरंजनात्मक चर्चांमुळे वातावरणात अधिकच रंगत भरली.

​मान्यवरांची उपस्थिती:

या उत्साहात रोटरी क्लब मुरूम सिटीचे अध्यक्ष प्रा. डॉ. आप्पासाहेब सूर्यवंशी, महात्मा बसवेश्वर पतसंस्थेचे अध्यक्ष शिवशरण वरनाळे, माजी अध्यक्ष गोविंद पाटील, डॉ. नितीन डागा, प्रा. डॉ. महेश मोटे, संतोष कांबळे, उपप्राचार्य कलय्या स्वामी यांच्यासह अनेक मान्यवर सहभागी झाले होते.

​"हुरडा पार्टी ही केवळ खाद्य मेजवानी नसून तो शेतकरी संस्कृतीचा उत्सव आहे. निसर्गाशी नाते जपण्याचा हा एक सुंदर मार्ग आहे," असे मत यावेळी शेतकरी विठ्ठल व सुनील कुडवकल यांनी व्यक्त केले.

​या सोहळ्याच्या यशस्वीतेसाठी महादेव मुळे, नरसप्पा पाटील आणि मल्लिनाथ पाटील यांनी विशेष पुढाकार घेत सर्वांचे आदरातिथ्य केले. व्यावसायिक हुरडा पार्ट्यांच्या गर्दीत अशा घरगुती आणि पारंपरिक आयोजनाने उपस्थितांची मने जिंकली.

बिराजदार वस्ती (ता. उमरगा) येथील कलाप्पा पाटील यांच्या शेतात हुरड्याचा आस्वाद घेताना मित्रपरिवार व मान्यवर.