अस्सल मराठमोळा थाट! तुतारी आणि संबळाच्याललकारीत तुळजापुरात रंगला शाळा प्रवेशोत्सव;नवागतांचे शाही स्वागत! मोफत स्कूल बॅगचेही वाटप

'Only न्युज धाराशिव' वृत्तसेवा 

तुळजापूर | उमाजी गायकवाड 

 – दीर्घ सुट्ट्यांनंतर आज सोमवार दि.१५ मे पासून पुन्हा एकदा शाळांची घंटा खणखणली असून, तुळजापूर येथील नगरपरिषद प्राथमिक शाळा क्रमांक २ मध्ये अनोख्या आणि अतिशय उत्साही वातावरणात 'शाळा प्रवेशोत्सव' साजरा करण्यात आला. अंगावर रोमांच उभे करणाऱ्या तुतारीची ललकारी आणि संबळाच्या कडकडाटात इयत्ता पहिलीच्या चिमुरड्यांचे शाही स्वागत करण्यात आले, ज्यामुळे शाळेचा पहिला दिवस विद्यार्थ्यांसाठी आणि पालकांसाठी अविस्मरणीय ठरला.

पायांचे ठसे आणि औक्षणाने गृहप्रवेश

शाळेच्या पहिल्याच दिवशी पहिल्या इयत्तेत प्रवेश करणाऱ्या चिमुरड्यांचे पाय कुंकवाच्या पाण्यात बुडवून त्यांचे कागदावर 'पायांचे ठसे' घेण्यात आले. त्यानंतर शिक्षकांनी व पालकांनी विद्यार्थ्यांचे औक्षण करून, पेढे भरवून आणि हाती गुलाबपुष्प देऊन त्यांचे स्वागत केले. आपल्या पाल्यांचे हे अनोखे स्वागत पाहून उपस्थित पालकांचे डोळे कौतुकाने पाणावले होते.

सर्व विद्यार्थ्यांना मोफत स्कूल बॅग व साहित्याचे वाटप

शाळेच्या पहिल्याच दिवशी इयत्ता पहिली ते सातवीच्या सर्व विद्यार्थ्यांना मोफत पाठ्यपुस्तकांचे वाटप करण्यात आले. विशेष म्हणजे, भाजपा जिल्हा कोषाध्यक्ष नागेश नाईक यांच्या वतीने पहिलीच्या सर्व विद्यार्थ्यांना आकर्षक स्कूल बॅगसह संपूर्ण शैक्षणिक साहित्याची किट मोफत देण्यात आली. पहिल्याच दिवशी हातात नवीन पुस्तके आणि नवीन पाठीवर नवी कोरी बॅग मिळाल्याने मुलांच्या चेहऱ्यावरचा आनंद द्विगुणित झाला होता.

पालक मेळावा आणि सेल्फी पॉईंटची धूम!

याच प्रसंगाचे औचित्य साधून शाळेत 'पालक मेळावा' देखील यशस्वीरित्या संपन्न झाला. यंदा शाळेत उभारण्यात आलेला 'सेल्फी पॉईंट' सर्वांच्या आकर्षणाचा केंद्रबिंदू ठरला. पहिल्या दिवशी शाळेत आलेल्या चिमुरड्यांनी आणि त्यांच्या पालकांनी या सेल्फी पॉईंटवर मनसोक्त फोटो काढून सोशल मीडियावर शाळा प्रवेशोत्सवाचा आनंद शेअर केला.

मान्यवरांची उपस्थिती अन् शुभेच्छांचा वर्षाव

या दिमाखदार सोहळ्याला नगरपरिषदेचे विरोधी पक्षनेते अमोल (भैय्या) कुतवळ, भाजपा जिल्हा कोषाध्यक्ष नागेश नाईक, शाळा व्यवस्थापन समितीचे अध्यक्ष लखन झाडपिडे, केंद्रप्रमुख मोहन भोसले, युवा नेते गुलचंद व्यवहारे, प्रसाद पानपुडे, पालक महादेव चोपदार आणि सेवानिवृत्त शिक्षक बापू शिंदे आदी मान्यवर प्रामुख्याने उपस्थित होते. उपस्थित सर्वच नेत्यांनी आणि मान्यवरांनी विद्यार्थ्यांना त्यांच्या पुढील शैक्षणिक वाटचालीसाठी मनःपूर्वक शुभेच्छा दिल्या.

हा सोहळा यशस्वी करण्यासाठी मुख्याध्यापक गणेश रोचकरी यांच्या मार्गदर्शनाखाली सहशिक्षक महेंद्र पाटील, महेंद्र कावरे, बाळासाहेब जेटीथोर, सुरजमल शेटे, किरण लोहारे, सुज्ञानी गिराम, विद्यादेवी स्वामी आणि शिवा डाके यांनी विशेष परिश्रम घेतले. नगरपरिषद शाळा क्रमांक २ च्या या अभिनव उपक्रमाचे तुळजापूर शहर व परिसरातून कौतुक होत आहे.

- Only न्युज धाराशिव वृत्तसेवा (तुळजापूर)