💥 शिवराज जरांगे-पाटील यांनी घेतले आई तुळजाभवानीचे दर्शन; मराठा आरक्षणाच्या संघर्षाला बळ मिळण्याचे साकडे;📍 तुळजापूरच्या तुळजाभवानी मंदिरात पूजकांकडून सत्कार; 'स्वराज्य'चे पदाधिकारी व मराठा आंदोलक उपस्थित

तुळजापूर| Only न्युज धाराशिव' वृत्तसेवा 

मराठा आरक्षणाच्या लढ्यातील संघर्षयोद्धा मनोज जरांगे-पाटील यांचे चिरंजीव शिवराज मनोज जरांगे-पाटील यांनी आज शुक्रवार  दि.24 रोजी  महाराष्ट्राची कुलस्वामिनी श्री तुळजाभवानी देवीचे भाविक अन् श्रद्धेने दर्शन घेतले. मनोज जरांगे-पाटील यांच्या सुरू असलेल्या आरक्षण संघर्षाला यश मिळावे आणि संपूर्ण मराठा समाजाला सुख-समृद्धी लाभावी, यासाठी त्यांनी तुळजाभवानी मातेच्या चरणी साकडे घातले.

तुळजाभवानी मंदिरातील श्री तुळजाभवानी देवीचे पुजारी कुमार टोले यांनी या वेळी मुख्य गाभाऱ्यात शास्त्राोक्त पद्धतीने पौरोहित्य व पूजा संपन्न केली. देवीच्या दर्शनानंतर मंदिर प्रशासकीय कार्यालयात पुजारी कुमार टोले यांच्या हस्ते शिवराज जरांगे-पाटील यांना श्री तुळजाभवानी देवीची भव्य प्रतिमा आणि शाल देऊन भावुक वातावरणात सत्कार करण्यात आला.

🔹 आरक्षण आंदोलक व पदाधिकाऱ्यांची प्रमुख उपस्थिती

शिवराज जरांगे-पाटील यांच्या या तुळजापूर दौऱ्या दरम्यान मराठा आंदोलक आणि स्थानिक राजकीय-सामाजिक क्षेत्रातील मान्यवरांची विशेष उपस्थिती होती. या प्रसंगी 'स्वराज्य' पक्षाचे जिल्हाध्यक्ष महेश गवळी आणि मराठा आरक्षण आंदोलक तेजस बोबडे यांच्यासह अनेक स्थानिक कार्यकर्ते मोठ्या संख्येने उपस्थित होते.

🔹 संघर्षाच्या पार्श्वभूमीवर तुळजाभवानीचे दर्शन

मराठा आरक्षणाच्या मागणीसाठी मनोज जरांगे-पाटील राज्यभर आंदोलन करत असून संपूर्ण महाराष्ट्राचे लक्ष या लढ्याकडे लागलेले आहे. अशा काळात त्यांचे चिरंजीव शिवराज यांनी तुळजापुरात येऊन घेतलेले तुळजाभवानीचे दर्शन हे मराठा आंदोलकांसाठी आणि शिवभक्तांसाठी विशेष औत्सुक्याचे ठरले. दर्शन प्रसंगी उपस्थितांनी 'एक मराठा, लाख मराठा'च्या घोषणा देऊन परिसर गूंजवून सोडला.