मंगरुळ गटातील रस्ते, शाळा आणि आरोग्य केंद्रांच्या दुरूस्तीसाठी जिल्हा परिषद सदस्या सीमाताई माडजे आक्रमक; जिल्हाधिकाऱ्यांना दिले निवेदनआरळी (बु.) ते काळेगाव रस्त्याची दुरवस्था दूर करून काम 'PMGSY' मधून तात्काळ मंजूर करण्याची मागणी;जिल्हा परिषद शाळांना निधी आणि प्राथमिक आरोग्य केंद्रांच्या दुरुस्तीसाठीही प्रशासनाकडे पाठपुरावा;जिल्हा परिषद सदस्या सौ. सीमाताई माडजे आणि भैरवनाथ माडजे यांनी जिल्हाधिकारी किर्ती कुमार पुजार यांची भेट घेऊन वेधले लक्ष

'Only न्युज धाराशिव' वृत्तसेवा 

तुळजापूर | उमाजी गायकवाड 

तुळजापूर तालुक्यातील मंगरुळ जिल्हा परिषद गटातील अत्यंत महत्त्वाचे दळणवळणाचे रस्ते, जिल्हा परिषद शाळांच्या नवीन वर्गखोल्या व दुरुस्ती, तसेच प्राथमिक आरोग्य केंद्र व उपकेंद्रांच्या इमारतींच्या दुरवस्थेचा प्रश्न आता ऐरणीवर आला आहे. या सर्व प्रलंबित आणि जनहिताच्या कामांसाठी निधी उपलब्ध करून देऊन ती तात्काळ मार्गी लावावीत, या मागणीसाठी मंगरुळ जिल्हा परिषद गटाच्या समाजवादी पार्टीच्या धडाडीच्या सदस्या सौ. सीमाताई भैरवनाथ माडजे-रोचकरी आणि त्यांचे पती सामाजिक कार्यकर्ते भैरवनाथ माडजे यांनी आज धाराशिवचे जिल्हाधिकारी किर्ती कुमार पुजार यांची प्रत्यक्ष भेट घेऊन निवेदनांद्वारे मागण्यांचे निवेदने त्यांच्यासमोर मांडले.

यावेळी मंगरुळ गटातील विविध गावांमधील मूलभूत समस्यांवर जिल्हाधिकाऱ्यांशी सविस्तर चर्चा करण्यात आली असून, प्रशासनाने यावर तात्काळ ठोस पावले उचलावीत अशी आग्रही मागणी या नेत्यांनी केली आहे.

मुख्य मागण्या आणि निवेदनाचा सविस्तर तपशील:

१. आरळी (बु.) परिसरातील रस्त्यांचा प्रश्न आणि विस्कळीत झालेले अर्थकारण:

जिल्हाधिकाऱ्यांना दिलेल्या मुख्य निवेदनात नमूद करण्यात आले आहे की, मंगरुळ जिल्हा परिषद गटातील आरळी (बुद्रुक) हे एक मोठी बाजारपेठ असलेले मध्यवर्ती गाव आहे. येथे दर शनिवारी आठवडी बाजार भरतो, तसेच बँक, मोठी बाजारपेठ आणि सरकारी दवाखाना असल्यामुळे शेजारील अनेक गावांतील नागरिकांची व रुग्णांची येथे मोठी वर्दळ असते. मात्र, गेल्या काही वर्षांपासून आरळी (बु.) ते काळेगाव आणि आरळी (बु.) ते आरळी (खुर्द) हा सुमारे ७ किलोमीटरचा रस्ता अत्यंत खराब झाला आहे. रस्त्यावरील खड्ड्यांमुळे वाहतुकीला मोठी अडचण निर्माण झाली असून, रुग्णांना दवाखान्यात आणताना नाहक त्रास सहन करावा लागत आहे. या दुरवस्थेमुळे परिसराचे अर्थकारण पूर्णपणे ठप्प झाले आहे. हा रस्ता PMGSY (प्रधानमंत्री ग्राम सडक योजना) विभागाकडून तात्काळ प्रशासकीय व तांत्रिक मान्यता देऊन सुरू करण्यात यावा, अशी मागणी करण्यात आली.

२. जिल्हा परिषद शाळांचे सक्षमीकरण आणि नवीन वर्गखोल्या:

विद्यार्थ्यांच्या शैक्षणिक सुविधेसाठी जिल्हा परिषद शाळांना निधी मिळण्याबाबतही त्यांनी स्वतंत्र निवेदन दिले. यामध्ये प्रामुख्याने जि. प. प्राथमिक शाळा तिर्थ (बुद्रुक) येथे नवीन एक वर्गखोली बांधण्यासाठी तातडीने निधी उपलब्ध करून द्यावा.

जि. प. प्राथमिक शाळा बिजनवाडी आणि जि. प. प्राथमिक शाळा कुंभारी येथील शाळांच्या इमारतींची दुरूस्ती करण्यासाठी तात्काळ निधी मंजूर करावा, जेणेकरून विद्यार्थ्यांना सुरक्षित वातावरणात शिक्षण घेता येईल.

३. आरोग्य यंत्रणे बळकटीकरण आणि निवासस्थानांची दुरुस्ती:

ग्रामीण भागातील नागरिकांचे आरोग्य सुरक्षित राहण्यासाठी आरोग्य उपकेंद्रांचा प्रश्नही मांडण्यात आला. प्राथमिक आरोग्य केंद्र (PHC) मंगरुळ येथील कर्मचारी निवासस्थानांची अवस्था बिकट असून, त्यांची तात्काळ दुरुस्ती करण्यात यावी. तसेच प्राथमिक आरोग्य उपकेंद्र तिर्थ (खुर्द) येथील उपकेंद्राच्या इमारतीची तातडीने दुरुस्ती करून कामासाठी निधी उपलब्ध करून द्यावा, जेणेकरून आरोग्य कर्मचाऱ्यांची व रुग्णांची गैरसोय टळेल.

जिल्हाधिकाऱ्यांचे सकारात्मक आश्वासन

मंगरुळ गटाच्या सर्वांगीण विकासाच्या दृष्टीने आणि नागरिकांच्या दैनंदिन गरजांशी निगडित असलेल्या या सर्व मागण्या ऐकून घेतल्यानंतर जिल्हाधिकारी किर्ती कुमार पुजार यांनी या प्रस्तावांवर सकारात्मकता दर्शवली. संबंधित विभागांना या संदर्भात तात्काळ अहवाल सादर करून तांत्रिक व प्रशासकीय मंजुरीच्या प्रक्रियेला गती देण्याचे निर्देश देणार असल्याचे आश्वासन त्यांनी सौ. सीमाताई माडजे आणि भैरवनाथ माडजे यांना दिले. या दौऱ्यामुळे मतदारसंघातील प्रलंबित विकासकामांना आता मोठी गती मिळण्याची चिन्हे दिसत आहेत.