तुळजापूरच्या धाराशिव रोड बायपास चौकाचे नामकरण; आता ओळखला जाणार 'शिवप्रताप चौक'! लोकभावनेचा आदर! तुळजापुरात 'शिवप्रताप चौका'चे थाटात अनावरण; नगराध्यक्ष विनोद गंगणे यांचा पुढाकार.

"Only न्यूज धाराशिव" वृत्तसेवा

तुळजापूर | उमाजी गायकवाड

तुळजापूर शहरातील धाराशिव रोड बायपास चौकाच्या नामकरणाचा प्रलंबित प्रश्न अखेर मार्गी लागला आहे. स्थानिक नागरिकांची आग्रही मागणी आणि नगर परिषदेच्या विशेष पाठपुराव्यातून या चौकाचे 'शिवप्रताप चौक' असे नामकरण करण्यात आले असून, नगराध्यक्ष विनोद (पिंटू) गंगणे यांच्या हस्ते या नामफलकाचे मोठ्या उत्साहात अनावरण करण्यात आले.

जनभावनेचा सन्मान

धाराशिव रोडवरील बायपास चौकास ऐतिहासिक 'शिवप्रताप' असे नाव देण्यात यावे, अशी मागणी गेल्या अनेक दिवसांपासून परिसरातील नागरिकांकडून केली जात होती. या मागणीचे गांभीर्य ओळखून ॲड. विराज जगदाळे यांनी नगर परिषदेकडे यासंदर्भात सतत पाठपुरावा केला होता. केवळ मागणी न करता, कायदेशीर प्रक्रियेचा भाग म्हणून नगर परिषदेचा अधिकृत ठराव घेण्याची आग्रही भूमिका त्यांनी मांडली होती.

नगर परिषदेत एकमत

या प्रस्तावाला नगराध्यक्ष विनोद गंगणे यांच्यासह सर्वपक्षीय नगरसेवकांनी सकारात्मक प्रतिसाद दिला. नगर परिषदेच्या सभेत या चौकाच्या नामकरणाचा ठराव एकमताने मंजूर करण्यात आला. लोकशाही मार्गाने आणि सर्वसंमतीने घेतलेल्या या निर्णयामुळे शहरात समाधानाचे वातावरण आहे.

उत्साहात अनावरण

नगराध्यक्ष विनोद गंगणे यांच्या हस्ते नामफलकाचे अनावरण करण्यात आले, तेव्हा परिसरात 'जय भवानी, जय शिवाजी'च्या घोषणांनी परिसर दुमदुमून गेला होता. यावेळी बोलताना मान्यवरांनी सांगितले की, "शहराच्या वैभवात भर टाकण्यासोबतच महापुरुषांच्या पराक्रमाची आठवण करून देणारी ही नामकरणे येणाऱ्या पिढीसाठी प्रेरणादायी ठरतील."

या सोहळ्याला नगराध्यक्ष विनोद पिटू भैय्या गंगणे, उपनगराध्यक्ष रामचंद्र आबा रोचकरी, नगरसेवक विशाल भैय्या रोचकरी, क्षिरसागर यांच्यासह शहरातील सर्व नगरसेवक, सामाजिक कार्यकर्ते, मोठ्या संख्येने शिवप्रेमी आणि स्थानिक नागरिक उपस्थित होते. या नामकरणामुळे बायपास परिसराला आता एक नवी आणि सन्मानाची ओळख मिळाली आहे.